ކަންކަން ހައްލުކުރުމުގައި ޔުނިފޯމްއެޅި މުއައްސަސާތަކަށް އިތުބާރުކޮށްގެން ތިބެވެން ނެތްކަމަށް ރައްޔިތުންގެ މަޖިލީހުގެ ނައިބުރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ވަނީ މަސްތުވާތަކެއްޗާބެހޭ ޤާނޫނަށް ސަރުކާރުން ހުށަހަޅާފައިވާ އިސްލާހުގެ ބިލަށް ބަހުސްކޮށްފަ އެވެ.
މި ބަހުސްގައި ވާހަކަ ދައްކަވަމުން ނާޒިމް ވިދާޅުވީ، ރައްޔިތުންގެ މަޖިލީހުގެ 241 ކޮމިޓީން މިހާރުވެސް ބައެއް މައްސަލަތައް ބަލަމުންގެންދާ ކަމަށެވެ. އަދި ބައެއް މައްސަލަތަކުގައި ކަސްޓަމްސްގެ އިހުމާލު ވަރަށް ބޮޑަށް އޮތް ކަމަށެވެ.
ނާޒިމް ވިދާޅުވީ 241 ކޮމެޓީން ބަލާ މައްސަލަތައް ނިމޭއިރު ހަރުކަށި އަދި ތަންފީޒުކުރެވޭ ފަދަ ހައްލުތަކެއް ސަރުކާރަށް ހުށަހަޅާނެ ކަމަށެވެ.
"އަޅުގަނޑުމެންނަށް ނެތް ޔުނިފޯމްއެޅި މުއައްސަސާތަކުގެ މައްޗަށް އިތުބާރުކޮށްގެން، މިކަންތައްތަކާ ދޭތެރޭ ބަލަން ތިބެވޭކަށް." ނާޒިމް ވިދާޅުވި އެވެ.
ނާޒިމް ވިދާޅުވީ މަސްއޫލިއްޔަތުތަކަށް އިހުމާލުވާ ގޮތަށް ކަންތައްތައް ކުރާނަމަ އިސްލާހީ ފިޔަވަޅުތައް އެޅުމަށް ދަންނަވަންޖެހޭ ފަރާތްތަކަށް ދެންނެވުމަކީ މަޖިލީހުގައި ތިބޭއިރު ޒިންމާއެއް ކަމަށެވެ.