މާދަމާ ރޭގެ ޖަލްސާ އަށް ހުރަސްއަޅައިފިނަމަ މަގުމަތީގައި ވެސް ޖަލްސާ ބާއްވަން ތައްޔާރު ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެމްޑީޕީން "ގާނޫނުއަސާސީގެ ދިފާއުގައި ރައްޔިތުންގެ" ނަމުގައި ބާއްވާ ބޮޑު ޖަލްސާ އޮންނާނީ މާދަމާ ރޭ ކާނިވާ ސަރަހައްދުގަ އެވެ.
މި ޖަލްސާއާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން ފައްޔާޒު ވިދާޅުވީ ޖަލްސާ ބާއްވަން ހުރަސްއަޅަން ނުކެރޭނެ ކަމަށާއި ޖަލްސާ ބާއްވަން ހުރަސްއަޅައިފިނަމަ ޖަލްސާ މަގުމަތީގައި ބާއްވާނެ ކަމަށެވެ. ގާނޫނީ އިމުގެ ތެރެއިން ކުރަން އުޅޭ ކަންކަމަށް ގާނޫނާ ހިލާފަށް އެއްވެސް ބަޔަކު ހުރަސްއަޅައިފިނަމަ މަގުމައްޗަށް ނިކުންނާނެ ކަމަށްވެސް ފައްޔާޒު ވިދާޅުވި އެވެ.
"އަޅުގަނޑުމެން މަގުމައްޗަށް ނެރެން ބޭނުންވާނަމަ އެހެން ނަހަދާ ހަމަ ވިދާޅުވާންވީ، އަޅުގަނޑުމެން ކައިރީ މަގުމައްޗަށް ނިކުމެލަދޭށޭ. އަޅުގަނޑުމެން ނިކުންނާނަން،" ފައްޔާޒު ވިދާޅުވި އެވެ.
އެމްޑީޕީ އަކީ ވަކި ރޭވުންތެރިކަމެއްގެ ތެރެއިން ސިޔާސީ ހަރަކާތް އިންތިޒާމު ކުރާ ޕާޓީއެއް ކަމަށާއި ސަރުކާރަށް އެއް އަހަރު ދެވުނުއިރު ޖަވާބުދާރީކުރަން ދެއްކި އެއްވެސް ވާހަކައެއް ސަރުކާރުން އަޑެއް ނޭހި ކަމަށް ފައްޔާޒު ވިދާޅުވި އެވެ.
"އެހެންވީމާ އަޅުގަނޑުމެން އެބަ މަޖުބޫރުވޭ އަޅުގަނޑުމެންގެ އަޑު ބާރުކޮށްލަން. އެގޮތުން ކުރާ ކަމެއް މާދަމާ ރޭގެ ޖަލްސާ އަކީ،" ފައްޔާޒު ވިދާޅުވި އެވެ.
މީގެއިތުރުން ފައްޔާޒު ވަނީ މާދަމާ ރޭގެ ޖަލްސާ އަށް ސިޔާސީ ހުރިހާ ޕާޓީތަކަށް ވެސް ދައުވަތު އަރުވާފަ އެވެ. މި ޖަލްސާގެ ތެރެއިން އެމްޑީޕީގެ ގައުމީ މަޖިލީހުގެ ބައްދަލުވުމެއް ބާއްވައި މުހިއްމު ނިންމުންތަކެއް ނިންމާނެ ކަމަށްވެސް އޭނާ ވިދާޅުވި އެވެ.