މި މަހުގެ ފަހުކޮޅު ސިނަމާތަކަށް ގެންނަން ނިންމާފައިވާ ވަރޫން ދަވަންގެ ފިލްމު "ބޭބީ ޖޯން" ގެ ޓްރެއިލާ މިއަދު އާންމުކޮށްފި އެވެ.
އޭނަގެ ވަރުގަދަ އެކްޝަން ރޯލަކުން ފެންނާނެ މި އެކްޝަން ތުރިލާ އަކީ މިދިޔަ އަހަރު ޝާހްރުކް ޚާންގެ "ޖަވާން" ގެނެސްދިން ތަމަޅަ ޑައިރެކްޓަރު އެޓްލީ 2016 ގައި ގެނެސްދިން "ތެރީ" ގެ ރިމޭކެކެވެ. "ބޭބީ ޖޯން" އަކީ އެޓްލީ އާއި ޕްރޮޑިއުސަރު މުރާދު ކެތާނީ ގުޅިގެން ޕްރޮޑިއުސްކޮށް، ތަމަޅަ ޑައިރެކްޓަރު ކާލީސް ހަދާފައިވާ ފިލްމެކެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމުގައި ވަރޫންއާ އެކީ ދެ ބަތަލާ އަކު ފެންނާނެ އެވެ. އޭގެ ތެރެއިން އެކަކީ މޮޅު ބަތަލާގެ ނެޝަނަލް އެވޯޑް ވެސް ހޯދާފައިވާ ދެކުނުގެ މަޝްހޫރު ބަތަލާ ކީރްތީ ސުރޭޝް އެވެ. "ބޭބީ ޖޯން" އަކީ ކީރްތީ ބޮލީވުޑަށް ތައާރަފުވާ ފިލްމެވެ.
މީގެ އަނެއް ބަތަލާ އަކީ މިހާރު ބޮލީވުޑުން ގިނަ ފުރުސަތުތަކެއް ފަހިވަމުން އަންނަ ޕަންޖާބީ ބަތަލާ ވަމީގާ ގައްބީ އެވެ.
"ބޭބީ ޖޯން" ގެ އިތުރު ކާސްޓުންގެ ތެރޭގައި ޖެކީ ޝްރޮފް، ރާޖްޕަލް ޔާދަވް އަދި ޝީބާ ޗައްޑާ ހިމެނެ އެވެ. އަދި ފިލްމުގެ ވަރަށް ހާއްސަ ފެނިލުންތަކެއްގައި ސަލްމާން ޚާނާއި ސާނިއާ މަލްއުތުރާ ވެސް ހިމެނެ އެވެ.
"ބޭބީ ޖޯން" ސިނަމާތަކަށް އަންނާނީ މި މަހުގެ 25 ގަ އެވެ.