ރޯދަމަހު ތަކެތީގެ އަގު ކޮންޓްރޯލް ކުރަން އެސްޓީއޯއާ އެކު މަޝްވަރާތައް ފަށައިފި އެވެ.
އިކޮނޮމިކް މިނިސްޓްރީ އިން ބުނީ ކުރިއަށް އޮތް 2025 ވަނަ އަހަރުގެ ރޯދަމަހަށް ތައްޔާރުވުމުގެ ގޮތުން އިކޮނޮމިކް މިނިސްޓަރު މުހައްމަދު ސައީދު އެސްޓީއޯގެ ޓީމާ މިއަދު ބައްދަލުކޮށްފައިވާ ކަމަށެވެ. މި ބައްދަލުވުމުގައި ތަކެތީގެ އަގުތައް ބޮޑުވިޔަ ނުދީ ހިފެހެއްޓުމަށް ހާއްސަ ސަމާލުކަމެއް ދިނުމަށް މަޝްވަރާ ކުރެވުނު ކަމަށް މިނިސްޓްރީން ބުނެ އެވެ.
އަދި ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތްވާ ގޮތުގެ މަތިން އަސާސީ ބޭނުންތަކުގެ މުދާ މެދުނުކެނޑި ލިބެން ހުރުން ކަށަވަރު ކުރުމާއި ގުޅޭގޮތުން ވެސް ވަނީ މަޝްވަރާކޮށްފަ އެވެ.
ރޯދައަށް އަގުތައް ކޮންޓްރޯލް ކުރަން މަޝްވަރާކޮށްފައިވާއިރު، ރޯދަ މަހު ކޮންމެ ގޭބީސީއަކަށް މަސްދަޅު ކޭހެއް ހިލޭ ދިނުމަށް ސަރުކާރުން ވަނީ ނިންމާފަ އެވެ. އަދި އަންނަ ރޯދަ މަހު ވެސް ފެނާއި ކަރަންޓު ބިލުން ޑިސްކައުންޓް ދިނުމަށް ވަނީ ނިންމާފަ އެވެ.
މިދިޔަ ރޯދަ މަހު ވެސް ފެނާއި ކަރަންޓު ބިލުން ޑިސްކައުންޓް ސަރުކާރުން ދީފައިވެ އެވެ.