ފުލުފުލުގައި ފިލްމުތަކަށް ސޮއި ކުރަން މިހާރު އެހާ ބޭނުން ނުވާ ކަމަށް މި އަހަރުގެ އެންމެ ކާމިޔާބު ބޮލީވުޑް ފިލްމު ކަމަށްވާ "އިސްތިރީ 2" ގެ ބަތަލާ ޝްރަދާ ކަޕޫރް ބުނެފި އެވެ.
ސައުދީ އަރަބިއްޔާގައި މިހާރު ކުރިއަށްދާ 'ރެޑް ސީ އިންޓަނޭޝަނަލް ފިލްމު ފެސްޓިވަލް" ގެ ތެރޭގައި ހުނަރުވެރި ބަތަލާ ބުނީ ފިލްމުތަކަށް މިހާރު ސޮއިކުރަނީ ސްކްރިޕްޓްތަކަށް ވަރަށް ބޮޑު އިސްކަމެއް ދީގެން ކަމަށެވެ. އެހެންވެ މިހާރު ހުށަހަޅާ ކޮންމެ ފިލްމަކަށް އެއްބަސް ނުވާ ކަމަށް ބުންޏެވެ.
"މިހާރު ކުރިއަށް ވުރެ މާ ބޮޑަށް ފިލްމުތައް ހޮވުމުގައި ވަރަށް ބަލަން. އެހެންވެ އަަސްލު ފުލުފުލުގައި ފިލްމުތަކަށް ސޮއި ނުކުރުމަކީ މައްސަލައެއް ކަމަކަށް ވެސް ނުދެކެން،" މިހާތަނަށް ވަރަށް ކާމިޔާބު ފިލްމުތަކެއް ކުޅެފައިވާ ޝްރަދާ ބުންޏެވެ. "ބޭނުން ވަނީ ތަފާތު އެކި ކަހަލަ ރޯލުތައް ކުޅެން. ހާއްސަކޮށް ލެންޖިން، ތަފާރު ރޯލުތަކަށް ވަރަށް ބޮޑު އިސްކަމެއް ދެވޭ."
މަޝްހޫރު އެކްޓަރު ޝަކްތީ ކަޕޫރްގެ ދަރިފުޅު ސޮއިކޮށްފައިވާ ފިލްމުތަކުގެ ތެރޭގައި "ނާގިން" ޓްރިލޮޖީ ހިމެނެ އެވެ. ދެހާސް ވިހީގައި އެ އިއުލާންކުރި ނަމަވެސް މަސައްކަތް އަދި މިހާތަނަށް އޮތީ ނުފެށި އެވެ.
ޝްރަދާ ކުޅެފައިވާ އެންމެ ކާމިޔާބު ފިލްމުތަކުގެ ތެރޭގައި "އާޝިގީ 2" އާއި "އޭކް ވިލަން"، "ބާގީ"، "އިސްތިރީ"، "ޗިޗޯރޭ" އަދި "ތޫ ޖޫޓީ މައްކާރް" ހިމެނެ އެވެ.