މިދިޔަ މަހުގެ ތެރޭގައި ޝޫޓިން ފެށި ޓައިގާ ޝްރޮފްގެ "ބާގީ" ފްރެންޗައިޒްގެ ހަތަރު ވަނަ ބައިގެ ބަތަލާގެ ރޯލަށް ސޯނަމް ބަޖްވާ ސޮއިކޮށްފި އެވެ.
އޭނަ މި ފިލްމަށް ސޮއިކުރި އިރު، މީގެ ޕްރޮޑިއުސަރު ސާޖިދު ނަދިއަދުވާލާ އަންނަ އަހަރު ބޮޑު ކާސްޓަކާ އެކީ ގެނެސްދޭން ހަމަޖެހިފައިވާ "ހައުސްފުލް 5" ގެ ކާސްޓްގައި ވެސް ސޯނަމް ހިމެނެ އެވެ. އޭނަ އަކީ އާންމުކޮށް ޕަންޖާބީ ފިލްމުތައް ކުޅޭ، އެ އިންޑަސްޓްރީގެ މަޝްހޫރު ބަތަލާއެކެވެ.
ނަމަވެސް ކުރިން ވެސް ބޮލީވުޑްގެ ފިލްމުތަކެއްގައި ސޯނަމް މަސައްކަތްކޮށްފައިވެ އެވެ. އެއީ އަޔޫޝްމަން ކްރާނާގެ 2019 ގެ "ބާލާ" އާއި ވަރޫން ދަވަންގެ 2020 ގެ "ސްޓްރީޓް ޑާންސާ" އެވެ.
އަންނަ އަހަރުގެ ސެޕްޓެމްބަރު މަހުގެ 5 ގައި ސިނަމާތަކަށް ގެންނަން ނިންމާފައިވާ "ބާގީ 4" ގެ މަސައްކަތް މިހާރު ބާރަށް ކުރިއަށްދާ އިރު، މީގެ ވިލަން އަކީ ސަންޖޭ ދަތެވެ. ފިލްމުގެ ޑައިރެކްޓަރަކީ އޭ ހަރްޝާ އެވެ.
"ބާގީ" ގެ ފުރަތަމަ ފިލްމާއި ތިން ވަނ ބައިގައި ޓައިގާއާ އެކީ ބަތަލާގެ ރޯލު ކުޅުނީ ޝްރަދާ ކަޕޫރެވެ. އަދި "ބާގީ 2" ގެ ބަތަލާ އަކީ ޓައިގާގެ ކުރީގެ ލޯބިވެރިޔާ ޑިޝާ ޕަޓާނީ އެވެ.