މިމަހުގެ 16 ވަނަ ދުވަހު އުވިގެން ދިޔަ ދިވެރާއްޖޭގެ ކުރީގެ ޤާނޫނުލް އުޤޫބާތު އެކުލަވާލީ ކީއްވެގެން ކަން އެނގޭ ހެއްޔެވެ ؟
1961 ވަނަ އަހަރު އެ ޤާނޫނުލް އުޤޫބާތު އެކުލަވާލެވުނު މައިގަނޑު ސަބަބެއް ކަމުގައި ތާރީޚް ދިރާސާ ކުރައްވާ ބޭފުޅުން ވިދާޅުވަނީ ދެކުނުގެ ގަޑުބަޑު ނުވަތަ ސުވަދީބުގެ މައްސަލައެވެ.
އެދުވަސްވަރު ޤާނޫނުލް އުޤޫބާތު އެކުލަވާލާފައިވަނީ ސީދާ ސުވަދީބު ކިޔާ ދައުލަތެއް އުފެއްދި މައްސަލައިގައި ހިމެނޭ މީހުންނަށް އަދަބު ދިނުމަށް ކަމަށްވެއެވެ. އެ ޤާނޫނުލް އުޤޫބާތު އެކުލަވާލުމަށް ފަހު ގާތްގަނޑަކަށް 400 އަށް ވުރެ މީހުންނަށް ތަފާތު އަދަބު ދީފައިވާއިރު އެމީހުންގެ މައްޗަށް ޙުކުމް އިއްވާފައިވަނީ އަލް މަރަޙޫމް މުޙައްމަދު ޖަމީލް ދީދީއެވެ.
މި ޤާނޫނުގެ ދަށުން އެންމެ ފުރަތަމަ ހުކުމެއް އިއްވާފައިވަނީ ހަވަރު ތިނަދޫގެ ބޭފުޅެއް ކަމުގައިވާ ޙަސަން ކަލޯ އުމުރަށް ޖަލަށް ލުމަށެވެ. އެންމެ ފާހަގަކޮށްލެވޭ ތަންކޮޅަކީ އޭރު ސުވަދީބުގެ މީހުންނަށް އަދަބު ދެވިފައިވަނީ އެމީހުން ކުއްވެރިވި ކަމަށް ބުނާ ޢަމަލް ހިންގި ފަހުން ހެދުނު ޤާނޫނަކުން ކަމެވެ.
އޭގެ 53 އަހަރު ފަހުން އެކުލަވާލި އަދި މި ޖުލައި މަހުގެ 16 ވަނަ ދުވަހު އަމަލް ކުރަން ފަށާފައިވާ ގާނޫނުލް އުގޫބާތަކީ ހުރިހާ ގޮތަކުންވެސް ވަރަށް ފުރިހަމަ ގާނޫނުލް އުގޫބާތެއް ކަމަށް ގާނޫނީ ގިނަ ފަރާތްތަކުން ދަނީ ބުނަމުންނެވެ.