ހެއިޓީގެ އުމުރުން ދުވަސްވީ ބަޔަކު ސިހުރު ހަދާ ކަމަށް ތުހުމަތުކޮށް، އެ ގައުމުގެ ގޭންގަކަށް ނިސްބަތްވާ ބަޔަކު 110 މީހަކު މަރާލައިފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ސިހުރު ހަދާކަމުގެ ތުހުމަތުގައި، ގޭންގް މެންބްރުންތަކެއް އުމުރުން ދުވަސްވީ ބަޔަކަށް ހަމަލާދީ މަރައިލީ ހެއިޓީގެ ވެރިރަށް ޕޯޓައު ޕްރިންސްގަ އެވެ.
މިކަމާ ކަންބޮޑުވުން ފާޅުކޮށް ދަ ނެޝަނަލް ހިއުމަން ރައިޓްސް ޑިފެންސް ނެޓްވޯކް (އާރްއެންޑީޑީއެޗް) އިން ބުނީ ދުވަސްވީ ބަޔަކަށް އަމާޒުކޮށް، ގޭންގެއްގެ ބަޔަކު ދިން ހަމަލާތަކެއްގައި މިހާތަނަށް 100 އަށް ވުރެ ގިނަ މީހުން މަރާލީ، ގޭންގްތަކަށް ނިސްބަތްވާ ބައެއް މީހުންގެ ދަރިންނަށް ސިހުރު ހަދާ ކަމަށް ތުހުމަތުކޮށް ކަމަށެވެ.
އެގޮތުން ގޭންގް ލީޑަރެއްގެ ފިރިހެން ދަރިއަކު މިދިޔަ ހަފުތާގައި ކުއްލިއަކަށް މާ ބޮޑަށް ބަލިވެ، އޭނަ މަރުވީ ބަޔަކު ސިހުރު ހަދައިގެން ކަމަށް ތުހުމަތުކޮށްފައިވެ އެވެ. އޭގެ ފަހުން އުމުރުން ދުވަސްވީ މީހުން ގަދައަށް ސިހުރު ހަދާ ކަމަށް ތުހުމަތުކޮށް، އެ މީހުންނަށް ހަމަލާތައް ދެމުން ގޮސްފައިވާ ކަމަށް އާރްއެންޑީޑީއެޗުން ބުންޏެވެ.
އެގޮތުން އުމުރުން 60 އަހަރުން މަތީގެ 110 މީހަކު މަރާލާފައި ވަނީ މިދިޔަ ހޮނިހިރު ދުވަހާއި މިދިޔަ ހުކުރު ދުވަހު އެވެ. ބައެއް މީހުންނަށް ތޫނު އެއްޗެހިން ހަމަލާދީގެން މަރާލާލި އިރު، އަނެއް ބައި މީހުން މަރައލީ ގައިގައި އަލިފާން ރޯކޮށެވެ.
ގޭންގްތަކުގެ ނުފޫޒު ގަދަ އަދި ދާހިލީ މައްސަލަތައް ވެސް ބޮޑު ގައުމެއްގެ ގޮތުގައި ފާހަގަކޮށްލެވޭ ހެއިޓީގައި މި އަހަރުގެ މިހާތަނަށް ގޭންގް ހަމަލާތަކުގައި 5،000 މީހުން މަރާލާފައިވާ ކަމަށް ބުނެ އދ. އިން ވެސް ކަންބޮޑުވުން ފާޅުކޮށްފައިވެ އެވެ.