ހިމާޔަތްކޮށްފައިވާ ފުވައްމުލަކުގެ ޗަސްބިންތަކުގައި ގަވާއިދާ ހިލާފަށް ދަނޑުވެރިކަން ކުރާތީ އެކަމާ ފިޔަވަޅު އަޅާނެ ކަމަށް ކައުންސިލުން ބުނެފި އެވެ.
ކައުންސިލުން މިއަދު ނެރުނު އިއުލާނެއްގައި ބުނީ ތިމާވެށި ރައްކައުތެރިކޮށް ދެމެހެއްޓުމާއިބެހޭ ޤާނޫނުގެ ދަށުން އެ ސިޓީގެ ބަންޑާރަ ކިޅި އާއި ދަޑިމަގި ކިޅީގެ އިތުރުން މިކިޅިތައް ވަށައިގެންވާ ޗަސްބިން ސަރަހައްދުތަކަކީ ޙިމާޔަތްކޮށްފައިވާ ތަންތަން ކަމަށެވެ. ނަމަވެސް އެ ތަންތަނުގައި ދަނޑުވެރިކަން ކުރާކަން ފާހަގަވެފައިވާތީ އެކަން ހުއްޓައިލަން އަންގާފައިވެ އެވެ.
ކައުންސިލުން ބުނީ ހިމާޔަތްކޮށްފައިވާ ޗަސްބިންތަކުގައި ހުއްދަ ނުހޯދާ ބައެއް ފަރާތްތަކުން އައު ދަނޑުތައް ހެދުމާއި ބައެއް ދަނޑުވެރިން ހުއްދަ ނުހޯދާ ދަނޑުތައް ބޮޑުކުރުމާއި ބައެއް ދަނޑުވެރިން ގަވާއިދާ ޚިލާފަށް ދަނޑުތަކުގައި އަލިފާން ރޯކުރުމާއި ބައެއް ދަނޑުވެރިން ހުއްދަ ނުހޯދާ ވިނަ އާއި ބޮޑެތި ގަސްގަހާގެހި، ކޮށައި/ކަނޑައި/އަންދާ ނުވަތަ އެހެންވެސް ގޮތްގޮތަށް، މެރުމާއި ހުއްދަ ހޯދުމަކާއި ނުލައި ގިނަ އަދަދަކަށް ކުނި އަޅައިގެން ޗަސްބިން ސަރަހައްދު ބެރުމުގެ އިތުރަށް އަލަ އޮޅު ބަރައިގެން ރުއް، ދޮންކެޔޮ ފަދަ އެހެނިހެން ގަސްތައް އިންދާކަން ވެސް ފާހަގަވެފައިވާ ކަމަށެވެ.
އެހެންވެ މިކަންކަން މިގޮތަށް ނުކުރަން އޮކްޓޯބަރު 27، 2022 ގައި ވެސް އަންގާފައިވާނެ ކަމަށް ކައުންސިލުން ބުންޏެވެ.
ނަމަވެސް މިފަހަކަށް އައިސް ޗަސްބިން ސަރަހައްދުތަކުގައި ޤަވާއިދާއި ޚިލާފަށް އަލަ އޮޅުތައް ބެރުމާއި ގަސްގަހާގެހި ކޮށައި/ކަނޑައި/އަންދާ އަދި ދަނޑު ބޮޑުކުރާކަން މި އިދާރާއަށް ފާހަގަވެފައިވާތީ އެ ކަންކަން ގާތުން ބަލައި ފިޔަވަޅު އަޅަމުން ދާނެ ކަމަށް ކައުންސިލުން ބުންޏެވެ.
ބަންޑާރަ ކިޅި އާއި ދަޑިމަގި ކިޅި އަދި މިކިޅިތައް ވަށައިގެންވާ ޗަސްބިން ސަރަހައްދުގައި އެ ބާވަތުގެ އެއްވެސް ކަމެއް ހިނގަމުން ދާކަން ފާހަގަ ކުރެވޭނަމަ، ފުވައްމުލަކު ނޭޗަރ ޕާކު އޮފީހުގެ ފޯން 7590059 އަށް ރަސްމީ ގަޑީގައި ގުޅައިގެން ރިޕޯޓްކޮށް ދިނުމަށް ވެސް އެދިފައިވެ އެވެ.