ބްރެޒިލްގެ ރައީސް ލޫލާ ޑި ސިލްވާގެ ސިކުނޑިއެއް ލޭ އެޅި ލިބުނު ގެއްލުންތަކަކާ ގުޅިގެން ބޮލުގެ އޮޕަރޭޝަނެއްކޮށްފި އެވެ.
މީޑިއާތަކުން ބުނީ 79 އަހަރުގެ ލޫލާ އަށް އިއްޔެ ސާޖަރީއެއް ހަދަން މަޖޫރުވެވަޑައިގަތީ ވަރަށް ބޮޑަށް ބޮލުގައި ރިއްސައިގެން ޑޮކްޓަރަށް ދެއްކުމުން، ހެދި އެމްއާރްއައި ސްކޭނަކުން ސިކުނޑި އަށް ލޭ އެޅިފައިވާކަން ފާހަގަވުމުން ކަމަށެވެ. އެކަމާ ގުޅިގެން ހެދި ސާޖަރީގައި އެއްވެސް ކޮމްޕްލިކޭޝަނެއް ދިމާނުވާ ކަމަށާއި ސާޖަރީ އަށް ފަހު ރައީސްގެ ހާލު ރަނގަޅު ކަމަށް ހޮސްޕިޓަލުން ނެރުނު ބަޔާނެއްގައި ބުންޏެވެ.
ލޫލާގެ ބޮލަށް ގެއްލުންތަކެއް ލިބުނީ މިދިޔަ އޮކްޓޯބަރު މަހުގެ 19 ވަނަ ދުވަހު ރިޔާސީ ގަނޑުވަރުގެ ފާހާނާތެރެ އަށް ވެއްޓި އެވެ. އެ ހާދިސާގައި އޭނަގެ ބޮލުގެ ފަހަތުން ފަޅައިގެން ފަސް ތަނަކުން ފަހަން ޖެހުނެވެ.
ލޫލާ ދެވަނަ ފަހަރަށް ބްރެޒިލްގެ ވެރިކަމާ ހަވާލުވެވަޑައިގަތީ މިދިޔަ އަހަރުގެ ޖެނުއަރީ 1 ގަ އެވެ. އޭނަ އަކީ މިހާރު އެ ގައުމުގެ 39 ވަނަ ރައީސެވެ. ބްރެޒިލްގެ 35 ވަނަ ރައީސްގެ ގޮތުގައި ލޫލާ އެންމެ ފުރަތަމަ ވެރިކަން ކުރެއްވީ 2003-2011 އަށެވެ.