އައްޑޫ ހިތަދޫ ކިނބިވައު ބީޗު ސަރަހައްދަށް މުއްދަތު ހަމަވެފައިވާ ގިނަ އަދަދެއްގެ ކްލޮރިން އެޅުމުގެ ސަބަބުން އެ ސަރަހައްދުގެ ދިރުންތަކެއް މަރުވާން ފަށައިފި އެވެ.
މި ވާހަކަ އައްޑޫ ނޭޗާ ޕާކުން މަރުވެފައިވާ ދިރުންތަކެއްގެ ފޮޓޯތަކާ އެކީ ސޯޝަލް މީޑިއާގައި ވެސް ހިއްސާކޮށްފައިވެ އެވެ.
މިކަމާ ކަންބޮޑުވުން ފާޅުކޮށް ނޭޗާ ޕާކުން ބުނީ ހިތަދޫގެ ކުރީގެ ހޮސްޕިޓަލާ ދިމާލުން އޮންނަ ކިނބިވައު ބީޗް ދިރުންތަކެއް މަރުވެ، ލައްގަން ދިމާވީ އެ ސަރަހައްދުގެ މޫދުގައި ކްލޮރީންގެ ލެވެލް ވަރަށް ބޮޑަށް މަތިވެގެން ކަމަށެވެ.
ނޭޗާ ޕާކުން ބުނީ މިއީ ވަރަށް ބޮޑު ގެއްލުމެއް ކަމަށާއި މީގެ ސަބަބުން ސަރަހައްދުގެ ފަރަށް ވެސް ބޮޑެތި ގެއްލުންތަކެއްވެފައިވާ ކަމަށެވެ. އެގޮތުން އެ ސަރަހައްދުގެ ފަރުގެ ބޮޑު ބައެއް ހުދުވެފައިވާ ކަމަށް ނޭޗާ ޕާކުން ބުނެފައިވެ އެވެ.
ފާހަގަކުރައްވާ ހާދީ ވިދާޅުވީ އެ ސަރަހައްދުގައި ހުރި ފެހި ކުލަައިގެ މަށާ ވެސް އެއްކޮށް ހުދުވެފައިވާ ކަމަށެވެ.
އެހެންވެ މިހާރު ނޭޗާ ޕާކުން މަސައްކަތް ކުރަނީ ބީޗް ސަރަހައްދަށް ލިބުނު ގެއްލުން އެއްކޮށް ދެނެގަތުމަށެވެ. އެކަމަކު މި މަސައްކަތް ކުރެވެން އޮތީ ކްލޮރިންގެ އަސަރު ކެނޑުމުންނެވެ.
ނޭޗާ ޕާކުން ވަނީ ކިނބިވައު ސަރަހައްދުން 25 ކިލޯގެ 15 ވަރަކަށް ކްލޮރިން ޓައްޕު ފެނިފައިވާ ކަމަށް ވެސް ފާހަގަކޮށްފަ އެވެ. ނަމަވެސް އެއީ ކޮން ބަޔަކު ކުރި ކަމެއް ނޭނގެ އެވެ. އެހެންވެ މިކަން މިހާރު އެތަނުން އޮތީ ފުލުހުންގެ ސަމާލު ކަމަށް ވެސް ގެނެސްފަ އެވެ.