ބޮލީވުޑްގެ ފިލްމެއް ކުޅެލަން ބޭނުންވާ ކަމަށް ހޮލީވުޑްގެ މަޝްހޫރު އެކްޓަރު ކްރިސް އިވަންސް ބުނެފި އެވެ.
"އެވެންޖާޒް" ފަދަ މަޝްހޫރު ފިލްމުތަކުގައި މަސައްކަތްކޮށްފައިވާ އެކްޓަރު ފިލްމުފެއާ އަށް ދިން އިންޓަވިއުއެއްގައި ބުނީ ކުރިން ނުބަލާ ވަރަށް މިހާރު ދުނިޔޭގެ އެކި ހިސާބުތަކުގެ ފިލްމުތައް ބަލާ ކަމަށެވެ. އަދި އަންހެނުންނަކީ ޕޯޗްގީޒް މީހަކަށްވާތީ ކުރިއަށް ވުރެ ބޮޑަށް މިހާރު ދުނިޔޭގެ އެކި ހިސާބުތަކުގެ ސިނަމާތަކަށް ޝައުގުވެރިކަން ދެވޭ ކަމަށް ކްރިސް ބުންޏެވެ.
އެގޮތުން އިންޓަނޭޝަނަލް ލެވެލްގައި ހަދާ ބޮލީީވުޑްގެ ފިލްމެއްގައި މަސައްކަތްކޮށްލަން ބޭނުންވާ ކަމަށް ބުންޏެވެ. އޭނަ ބުނީ ސިނަމާ އަކީ "ޔުނިވާސަލް ލެންގްއޭޖެއް" ކަމަށާއި އެ ސަބަބާ ހުރެ ކޮންމެ ބަހަކުން ފިލްމެއް ހެދިޔަސް، އެ ކިޔައި ދެވެނީ ހަމަ މީހުންގެ ވާހަކަ ކަމަށް ކްރިސް ބުންޏެވެ.
ބޮލީވުޑްގެ ފިލްމަކަށް ޝައުގުވެރިޔަސް ބިރުގަންނަ ކަމެއް އެބައޮތް ކަމަށް މިހާތަނަށް ކާމިޔާބު އެތައް ފިލްމެއް ކުޅެފައިވާ 43 އަހަރުގެ އެކްޓަރު ބުންޏެވެ. އެގޮތުން ސަމާސާއަކަށް ހަދާފައި އޭނަ ބުނީ ބޮލީވުޑްގެ ފިލްމުތަކުގައި ވަރަށް ނެށުން އޮންނަކަން އެނގޭ ކަމަށެވެ.
"އެހެންވީމަ އެކަން ކުރަންވެއްޖެ ނަމަ ތަންކޮޅެއް އުނދަގޫ ވެދާނެ. އެކަމަކު ހަމަ ބޭނުން ޓްރައިކޮށްލަން." ކްރިސް ބުންޏެވެ.
އޭނަގެ އެންމެ ފަހުގެ ފިލްމަކީ މިދިޔަ މަހުގެ 6 ގައި ސިނަމާތަކަށް ގެނައުމަށް ފަހު، މާދަމާ އެމެޒޯން ޕްރައިމް ވީޑިއޯ އަށް ދޫކޮށްލާ ކްރިސްމަސް އެޑްވެންޗާ ކޮމެޑީ "ރެޑް ވަން" އެވެ. ޖޭކް ކަޒްދާން ޑައިރެކްޓްކުރި މި ފިލްމުގައި ޑްވޭން ޖޯންސަން (ރޮކް) ވެސް ހިމެނެ އެވެ.
ބޮލީވުޑްގެ ފިލްމަކަށް ކްރިސް ޝައުގުވެރިކަން ފާޅުކުރި އިރު، އެ އިންޑަސްޓްރީ އަކީ ހޮލީވުޑް ފިޔަވައި ދުނިޔޭގައި ދެން އެންމެ ނުފޫޒު ގަދަ ފިލްމު އިންޑަސްޓްރީ އެވެ.