ހިންދީ ސިނަމާގެ އެންމެ ނުފޫޒު ގަދަ އާއިލާ ކަމަށްވާ ކަޕޫރް ޚާންދާނުން އިންޑިއާގެ ބޮޑުވަޒީރު ނަރެންްދުރެ މޯދިއާ ބައްދަލުކޮށް، ހިންދީ ސިނަމާގެ މަޝްހޫރު ފިލްމީ ޝަހުސިއްހަތު ރާޖް ކަޕޫރްގެ ހަނދާނީ ހަދިޔާތަކެއް ވެދުންކޮށްފި އެވެ.
ކަޕޫރް ޚާންދާނުން އިއްޔެ ޕްރެވައިޓް ޖެޓެއްގައި ނިއު ދިއްލީ ކުރި ދަތުރުގައި މޯދީއާ ބައްދަލުކުރި މީހުންގެ ތެެރޭގައި ރާޖް ކަޕޫރްގެ ކާފަ ދަރިން ކަމަށްވާ ކަރިޝްމާ ކަޕޫރާއި ކަރީނާ ކަޕޫރާއި ރަންބީރް ކަޕޫރާއި އޭނަގެ ދައްތަ ރިދިމާ ކަޕޫރްގެ އިތުރުން އަރްމާން ޖެއިން އާއި އާދާރު ޖެއިން ހިމެނެ އެވެ.
މީީގެ އިތުރުން ކަރީނާގެ ފިރިމީހާ ސައިފް އަލީ ޚާނާއި ރަންބީރް އަންހެނުން އާލިއާ ބަޓްގެ އިތުރުން މަންމަ ނީތޫ ކަޕޫރާއި ރާޖް ކަޕޫރްގެ ދަރިންގެ ތެރެއިން މިހާރު ދުނިޔޭގައި ހުރި ހަމައެކަނި އަންހެން ދަރިފުޅު ރީމާ ޖެއިންގެ އިތުރުން ވެސް ކަޕޫރް ޚާންދާނަށް ނިސްބަތްވާ އިތުރު ބަޔަކު މޯދީގެ ބައްދަލުވުމުގައި ބައިވެރިވި އެވެ.
މި ބައްދަލުވުމަކީ ރާޖް ކަޕޫރަށް މި މަހުގެ 14 ވަނަ ދުވަހު 100 އަހަރު ފުރޭތީ އެކަމާ ގުޅިގެން އާއިލާ އެކަން ފާހަގަކުރަން ކުރިއަށް ގެންދާ ކަންކަމުގެ ތެރެއިން ބޭއްވި ބައްދަލުވުމެކެވެ. ކާމިޔާބު އެތައް ފިލްމެއް ކުޅެ، އެތައް ފިލްމެއް ޕްރޮޑިއުސްކޮށް، ޑައިރެކްޓް ވެސް ކޮށްފައިވާ ރާޖް ކަޕޫރް ވަނީ އުމުރުން 63 ގައި ޖޫން 2، 1988 ގައި މަރުވެފަ އެވެ.
އޭނަގެ ހަނދާންތައް އާ ކުރުމުގެ ގޮތުން 100 ވަނަ އުފަން ދުވަހާ ގުޅިގެން މި މަހުގެ 13-15 އަށް ފިލްމު ފެސްޓިވަލެއް ބާއްވަން ވެސް ހަމަޖެހިފައިވެ އެވެ. އެ ފެސްޓިވަލްގައި ރާޖް ކަޕޫރް އެންމެ ފާހަގަކޮށްލެވޭ ފިލްމު އިންޑިއާގެ 40 ސިޓީއެއްގެ 135 ސިނަމާއެއްގައި ދައްކާނެ އެވެ.