ރާއްޖޭގައި ހުރި އިންވެސްޓްމެންޓް ފުރުސަތުތަކުގެ މައުލޫމާތު ދިވެހި ސަރުކާރުން އޮމާންއާ ހިއްސާކޮށްފި އެވެ.
މިކަމާ ގުޅޭ ގޮތުން މަޝްވަރާކުރީ ހާރިޖީ ވަޒީރު އަބްދުﷲ ހަލީލު އޮމާނަށް ކުރައްވަމުންދާ ދަތުރުފުޅުގެ ތެރެއިން އެ ގައުމުގެ މާލީ ވަޒީރު ސުލްޠާން ބިން ސާލިމް ބިން ސާއިދު އަލްހަބްސީއާ ބައްދަލުކުރެއްވި ކުރެއްވުމުގަ އެވެ.
މިނިސްޓަރު ހަލީލު ވަނީ މި ބައްދަލުވުމުގައި ދިވެހި ސަރުކާރުން ގެންގުޅޭ ތަރައްގީގެ ސިޔާސަތުތަކުގެ އިތުރަށް ރާއްޖޭގައި އިންވެސްޓުކުރަން ހުރި ފުރުސަތުތަކުގެ މައުލޫމާތު އޮމާނުގެ މާލީ ވަޒީރާ ހިއްސާކުރައްވާފަ އެވެ. އަދި ދެ ގައުމުގެ މެދުގައި އެކި ދާއިރާތަކުން ގުޅުން ބަދަހިކުރުމަށް ކުރެވިދާނެ މަސައްކަތްތަކާ ގުޅޭ ގޮތުން ވެސް ވަނީ މަޝްވަރާކޮށްފަ އެވެ.
އޮމާނަށް މިނިސްޓަރު ހަލީލު ކުރައްވާ ދަތުރުފުޅަކީ އޮމާންގެ ފޮރިން މިނިސްޓަރު ސައްޔިދު ބަދުރު ބިން ޙަމަދު ބިން ޙަމޫދު އަލްބުސަޢީދީގެ ދަޢުވަތަކަށް ތިން ދުވަހުގެ މުއްދަތަށް ކުރައްވާ ދަތުރުފުޅެކެވެ.
ފޮރިން މިނިސްޓްރީން ބުނީ މިިނިސްޓަރު ޚަލީލްގެ މި ދަތުރުފުޅުގައި، އޮމާންގެ ފޮރިން މިނިސްޓަރާއި ބައްދަލުކުރައްވައި، ދެ ޤައުމުގެ ދެމެދުގައި އޮންނަ ޒަމާންވީ ގުޅުން އިތުރަށް ބަދަހިކުރެވޭނޭ ގޮތްތަކާމެދު މަޝްވަރާކުރެއްވުމަށް ހަމަޖެހިފައިވާ ކަމަށެވެ.
މީގެ އިތުރުންވެސް ތަފާތު ދާއިރާތަކުން ގުޅުން ބަދަހިކުރުމުގެ ފުރުޞަތުތައް ހޯދުމަށް އޮމާން ސަރުކާރުގެ އިސްވެރިންނާ މިނިސްޓަރު ބައްދަކުރެއްވުމަށް ހަމަޖެހިފައިވާ ކަމަށް މިނިސްޓްރީން މައުލޫމާތުދެ އެވެ.