އިންޑިއާގެ އެންމެ އަގުބޮޑު ގެތަކުގެ ތެރޭގައި ހިމެނޭ ބޮލީވުޑްގެ ތަރި ޝާހްރުކް ޚާންގެ ގެ 'މަންނަތު' އަށް އިތުރު ދެ ފްލޯ އިތުތު ކުރަން ނިންމައި އެކަމުގެ ހުއްދަ އަށް އެދިއްޖެ އެވެ.
މީޑިއާތަކުން ބުނީ އެންމެ ޒަމާނީ ފެންވަރަށް އިމާރާތްކޮށްފައިވާ ލަގްޒަރީ ގަނޑުވަރެއް ކަހަލަ ހަ ބުރީގެ ގެއަށް ދެ ފްލޯ އިތުރު ކުރަން އެކަން މަހާރަޝްތުރާ ކޯސްޓަލް ޒޯން މެނޭޖްމަންޓް އޮތޯރިޓީ (އެމްސީޒީއެމްއޭ) އަށް މިދިޔަ މަހުގެ ތެެރޭގައި ހުށަހެޅީ ޝާހްރުކްގެ އަންހެނުން އިންޓީރިއާ ޑިިޒައިނަރު ގޯރީ ޚާން ކަމަށެވެ.
އެގޮތުން ގޯރީގެ އެ ހުށަހެޅުމާ ގުޅިގެން އެ އޮތޯރިޓީން އިއްޔެ އާއި މިއަދު ވެސް އޭނައާ ބައްދަލުކޮށްފައިވާ ކަމަށް މީޑިއާތަކުން ބުންޏެވެ. ރިޕޯޓްތައް ބުނާ ގޮތުން "މަންނަތު" އަށް އިތުރު ދެ ފްލޯ އަށް 25 ކްރޯޑް ރުޕީސް (3 މިލިއަން ޑޮލަރު) ހޭދަވާނެ އެވެ.
މުމްބާއީ އަށް ޒިޔާރަތްކުރާ މީހުންގެ "ހޮޓްސްޕޮޓެއް" ގެ ގޮތުގައި ވެސް ފާހަގަކޮށްލެވޭ "މަންނަތު" އަކީ އެންމެ ފުރަތަމަ 1914 ގައި އިމާރާތްކޮށްފައިވާ ގެއެކެވެ. އެހެންވެ އެ ގެ ހުރި ބިމަކީ ހެރިޓޭޖް ސައިޓެއް ވެސް މެ އެވެ. ޖުމްލަ 2،091.38 އަކަފޫޓްގެ އެ ބިން ޝާހްރުކް ގަނެ، އެންމެ ޒަމާނީ ފެންވަރުގެ ބޮޑު ގެއެއް ބިނާކުރި އިރު، އެ ގެއަކީ ވަރަށް ގިނަ ވަސީލަތްތައް އެކުލެވޭ ހޮތަށް ޑިޒައިންކޮށްފައިވާ ގެއެކެވެ.
އެގޮތުން "މަންނަތު" ގައި ޕޫލާއި ޖިމާއި ސިނެމަކާއި އޮފީސް ބައެއް ވެސް ހިމެނެ އެވެ. މި ގޭގެ ތިން ވަނަ ފްލޯގައި، ގެ ކައިރި އަށް އެއްވާ ޝާހްރުކްގެ ފޭނުންނާ ބައްދަލުކުރަން ހާއްސަ ޕްލެޓްފޯމެއް ވެސް ސަލާމަތީ ގިނަ ފިޔަވަޅުތަކަކާ އެކީ ހަދާފައިވެ އެވެ.
"މަންނަތު" ގެ އަގު މިހާރު 200 ކްރޯޑް ރުޕީސް (24 މިލިއަން ޑޮލަރު) އަށް އަރަ އެވެ. ތިން ކުދިން ތިބި ޝާހްރުކް، 59، އަކީ ބޮލީވުޑްގެ އެންމެ މުއްސަނދި އެއް ތަރި އެވެ.