މިދިޔަ އަހަރަށް ވުރެ މިއަހަރު ސައިބާކްރައިމްގެ މައްސަލަތައް ދެގުނަ އަށް އިތުރުވެފައިވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.
ސައިބާ އެކްސްޕޯ ފެށުމުގެ ރަސްމިއްޔާތުގައި ވާހަކަދައްކަމުން ސީޕީ ޝުޖާއު ވިދާޅުވީ މިދިޔަ އަހަރު ފުލުހުންނަށް ރިޕޯޓު ކުރީ ސައިބާ ކްރައިމްގެ 99 މައްސަލަ ކަމަށާއި އެހެން ނަމަވެސް މި އަހަރުގެ މިހާތަނަށް 173 އަށް ވުރެ ގިނަ މައްސަލަ ހުށަހެޅި ތަހުގީގު ކުރެވެމުންދާ ކަމަށެވެ.
މީގެތެރެއިން އެންމެ ގިނައިން ހުށަހެޅެނީ ހެކް ކުރުމުގެ މައްސަލަތައް ކަމަށާއި އެގޮތުން ބޭންކް އެކައުންޓް ހެކް ކުރުމާއި، ސޯޝަލް މީޑިއާ އެކައުންޓުތައް ހެކް ކުރުމުގެ އިތުރުން، ސަރުކާރާއި ބައެއް ޕްރައިވެޓް އޮފީސްތަކުގެ ވެބްސައިޓުތައް ހެކް ކުރުމުގެ މައްސަލަތައް ހިމެނޭ ކަމަށް ސީޕީ ވިދާޅުވި އެވެ.
އަދި ގަވާއިދާ ޚިލާފަށް ލިޔުންތައް ފޯޖު ކުރުމުގެ މައްސަލަތަކާއި، އޮންލައިން ވިޔަފާރީގެ ނަމުގައި ސޯޝަލް މީޑިއާގައި ޕޭޖުތައް ހަދައި، މަކަރާއި ހީލަތުން އޮޅުވާލައިގެން ފައިސާ ހޯދުމާއި، ސޯޝަލް މީޑިއާގެ އެކި ޕްލެޓްފޯމުތަކުގައި ތަފާތު އެކިއެކި ނަންނަމުގައި ސްކޭމްކޮށްގެން ފައިސާ ހޯދަމުންދާ މައްސަލަތައް އިތުރުވަމުންދާ ކަމަށް ސީޕީ ވިދާޅުވި އެވެ.
މިފަދަ ކަންކަމަކީ ކޮންމެ ފަރުދަކު ވެސް ހޭލުންތެރިވާންޖެހޭ ކަމަށާއި މިފަދަ ކަންކަން މަދުކުރެވޭނީ ހޭލުންތެރިވެ، ސަމާލުވެ ތިބެގެންނާއި ސަރުކާރާއި ކަމާބެހޭ ފަރާތްތަތަކަށް އެއްބާރުލުން ދީގެން ކަމަށް ސީޕ ވިދާޅުވި އެވެ.
މިއަދު ހުރިހާ މަސައްކަތެއް ވެސް ކުރެވެމުން ދަނީ ޑޖިޓަލްކޮށް ކަމަށްވާއިރު މިކަމުގެ ސަބަބުން މުޖުތަމައުގައި ދިރިއުޅޭ ބައެއް ފަރުދުން، މި ކަންކަމަށް ހޭލުންތެރިނުވުމުގެ ނަތީޖާއަކަށްވަނީ، ސައިބާކްރައިމްގެ ޝިކާރައަކަށްވެ، ފޫނުބެއްދޭވަރުގެ އަގުބޮޑެތި ގެއްލުންތައް ލިބި، ޑޭޓާތައް ގެއްލިގެން ދިއުން ކަމަށް ވިދާޅުވި އެވެ.
މިކަމުގެ ސަބަބުން ދިރިއުޅުމުގައި ގިނަ ތަކުލީފުތަކެއް އުފުލަންޖެހޭ ކަމަށާއި މިކަން ހުއްޓުވުމަށް އެންމެ އެކުގައި މަސައްކަތް ކުރުމަށް އިހުނަށްވުރެ މިއަދު މުހިންމުވެފައިވާ ކަމަށްވެސް ސީޕީ ވިދާޅުވި އެވެ.