ހައުސިން މިނިސްޓްރީގައި އަލިފާން ރޯވެ އަނދަމުން އެބެދަ އެވެ.
ހަތަރު ބުރީގެ މި އިމާރާތުގައި ވަރަށް ބޮޑަށް ރޯވެ، އަނދަމުންދާ އިރު، އިމާރާތުގެ ބޭރުުން ވެސް ވަރަށް ގަދައަށް އަލިފާން ފެތުރި މުޅި ސަރަހައްދަށް ބޯ ދުން ފެތުރިފައިވެ އެވެ. މި އިމާރާތަކީ ބޭރުން ފެންނަ އިރު، ޓިނުން ހަދާފައިވާ ސްޓަރަކްޗާއެއް އެކުލެވޭ ގޮތަށް ހަދާފައިވާ އިމާރާތެކެވެ.
އަލިވާން ނިއްވަން އެމްއެންޑީއެފްގެ ފަޔަ އެންޑް ރެސްކިއު އިން މަސައްކަތް ކުރަމުން ދިޔަ ނަމަވެސް އަލިފާންގަނޑު ކޮންޓްރޯލް ނުވެ، މުޅި އިމާރާތް ދަނީ އަނދަމުންނެވެ. މި ހާދިސާގައި ހައުސިން މިނިސްޓްރީ ކައިރީގައި ހުރި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީ ހިންގާ އިމާރާތަށް ވެސް ބޮޑެތި ގެއްލުންތަކެއް ވަނީ ލިބިފަ އެވެ.
މި ހާދިސާއާ ގުޅިގެން ހައުސިން މިނިސްޓްރީ ހުރި ސަރަހައްދު މިހާރު ބަންދުކޮށްފައިވާ އިރު، މި ސަރަހައްދަށް ރައީސް ޑރ. މުހައްމަދު މުއިއްޒު ވެސް ވަޑައިގެންފައިވެ އެވެ.
ހައުސިން މިނިސްޓްރީގައި ރޯވެފައި ވަނީ މިއަދުގެ ވަރަށް ހެނދުނުގެ ވަގުތެއްގަ އެވެ. ނަމަވެސް އަލިފާން ރޯވާން ދިމާވި ސަބަބެއް އަދ ސާފެއް ނުވެ އެވެ.
މާލޭގައި ދޭތެރެ ދޭތެރެ އިން އަލިފާނުގެ ބޮޑެތި ހާދިސާތައް ހިނގައި، ބޮޑެތި ގެއްލުންތަކެއް މި ފަހުން ލިބިފައިވާކަން ވެސް ފާހަގަކުރެ އެވެ.