ޓައިގާ ޝްރޮފްގެ "ބާގީ" ފްރެންޗައިޒްގެ ހަތަރު ވަނަ ބަޔަށް 2021 ގެ މިސް ޔުނިވާސް ހަރްނާޒް ސަންދޫ ވެސް ސޮއިކޮށްފި އެވެ.
އެ ފިލްމުގެ ކާސްޓަށް އޭނަ އިތުރުވިކަން އެ ފިލްމު އުފައްދާ ސްޓޫޑިއޯ، ނަދިއަދުވާލާ ގްރޭންޑް ސަން އެންޓައިންމަންޓުން މިއަދު އިއުލާންކޮށްފައިވެ އެވެ.
"ބާގީ 4" ވާނީ ހަރްނާޒް، 24، ގެ ފުރަތަމަ ބޮލީވުޑްގެ ފިލްމަށެވެ. އޭނަ ކުރިން ޕަންޖާބީ ދެ ފިލްމެއްގައި މަސައްކަތް ކުރުމުގެ އިތުރަށް ބައެއް ވީޑިއޯ ލަވަތައް ވެސް ކުޅެފައިވެ އެވެ.
މިދިޔަ މަހުގެ ތެރޭގައި ޝޫޓިން ފެށި "ބާގީ 4" އަށް ހަރްނާޒް ސޮއިކުރި އިރު، މި ފިލްމުގެ ކާސްޓްގައި ޕަންޖާބީ ބަތަލާ ސޯނަމް ބަޖްވާ ހިމެނޭކަން ވެސް މީގެ ދެ ދުވަސް ކުރިން އިއުލާންކޮށްފައިވެ އެވެ. ފިލްމުގެ ވިލަން އަކީ ސަންޖޭ ދަތެވެ.
އަންނަ އަހަރުގެ ސެޕްޓެމްބަރު 5 ގައި ސިނަމާތަކަށް ގެންނަން ތާވަލުކޮށްފައި އޮތް "ބާގީ 4" ގެ ޑައިރެކްޓަރަކީ މި އަހަރުގެ އޮގަސްޓްގައި ޖޯން އަބްރަހަމްގެ "ވޭދާ" ގެނެސްދިން އޭ ހަރްޝާ އެވެ.