ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރަށް ހުށަހެޅުނު ކަންކަމުގެ ތެރެއިން 73 ޕަސެންޓު މަސައްކަތް ނިންމުމަށްފަހު މަޖިލިސް މިއަދު ޗުއްޓީ އަށް ހިނގައްޖެއްޖެ އެވެ.
މިއަދު ބޭއްވި ތިންވަނަ ދައުރުގެ ފަހު ޖަލްސާ ނިންމަވާލައްވަމުން މަޖިލީހުގެ ރައީސް އަބްދުލްރަހީމް އަބްދުﷲ ވިދާޅުވީ ތިންވަނަ ދައުރުގައި 20 ބިލާއި އެއް ގަރާރާއި ސަރުކާރުން ހުށަހެޅި 13 މައްސަލަ އާއި ރިޔާސަތުން ހުށަހެޅި ފަސް މައްސަލައަކާއި، ހަތަރު ކުއްލި މައްސަލައެއްގެ އިތުރުން އެހެނިހެން މައްސަލަތަކާއި ގުޅޭ 7 ރިޕޯޓެއްގެ މަސައްކަތް ނިންމާފައިވާ ކަމަށެވެ.
"މަޖިލީހަށް ހުށަހެޅިފައިވާ މަސައްކަތުގެ ޖުމްލަ 73.3 ޕަސެންޓް ޕަސެންޓް މަސައްކަތް މި ދައުރުގެ ނިޔަލަށް ވަނީ ނިންމިފައި،" އަބްދުލްރަހީމް ވިދާޅުވި އެވެ.
މަޖިލީހުގެ ގަވާއިދު ބުނާ ގޮތުން އަހަރުގެ ފުރަތަމަ ދައުރު ކުރިއަށް ދާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށެވެ. ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޮގަސްޓް މަހުގެ ނިޔަލަށެވެ. ތިންވަނަ ދައުރު ހިނގާނީ އޮކްޓޯބަރު މަހުގެ ފުރަތަމަ ދުވަހުން ފެށިގެން ނޮވެމްބަރުގެ ނިޔަލަށެވެ. ނަމަވެސް މަޖިލީހުގައި ނުނިމި މަސައްކަތްތަކެއް ހުރުމުން ތިންވަނަ ދައުރު ވަނީ ދިގު ދަންމާލާފަ އެވެ.