ކުރީ ސަރުކާރުގައި ވައްކަން ކުރި ފަރާތްތައް ދިގު މުއްދަތަކަށް ޖަލަށްލާންޖެހޭ ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެ އެވެ.
ބަދަލު ދިނުމަށް ކުރީ ސަރުކާރުން ހެދި އެއްބަސްވުންތަކާއި ގުޅޭގޮތުން މާލިއްޔަތު ކޮމިޓީން ދިރާސާކޮށް ތައްޔާރުކުރި ރިޕޯޓަށް ބަހުސް ކުރައްވަމުން އަޒާން ވިދާޅުވީ ކުރީ ސަރުކާރުން ބަދަލުގެ ގޮތުގައި ފަސް އަހަރުތެރޭ ދެ ބިލިއަނަށް ވުރެ ގިނަ ރުފިޔާ އެކި ފަރާތްތަކަށް ދީފައިވާ ކަމަށާއި އަދި 36 ރަށާއި ފަޅު 50 އަހަރަށް އެކި ފަރާތްތަކަށް ކުއްޔަށް ދީފައިވާ ކަމަށެވެ.
ބަދަލުގެ ގޮތުގައި ދީފައިވާ ދެ ބިލިއަން ރުފިޔާގެ ތެރެއިން ގިނަ ފައިސާ ދީފައިވަނީ ކުރީ ސަރުކާރުގެ އިސްވެރިންނާއި ސިޔާސީ ގޮތުން ގުޅުން އޮތް އަދި އާއިލީ ގޮތުން އިސް ފަރާތްތަކާއި ގުޅުން އޮތް ފަރާތްތަކަށް ކަމަށާއި އަދި ފަޅުތަކާއި ރަށްތައް ދޫކޮށްފައިވަނީ އޭރު ކެބިނެޓްގައި ތިއްބެވި ބޭފުޅުންގެ އާއިލީ ބޭފުޅުންނަށް ކަމަށްވެސް ވިދާޅުވި އެވެ.
މިއީ ލަސްނުކޮށް ތަހުގީގު ކުރަންޖެހޭ ކަމެއް ކަމަށާއި މިފަދަ ކަންކަން ކުރި ފަރާތްތަކަށް ބޭނުން ގޮތަކަށް އުޅެން ފުރުސަތު ލިބުނީ މި ވެރިކަމަށް އެއް އަހަރު ވެގެންދިޔައިރު މި މައްސަލަތައް ތަހުގީގު ކުރަން ނުފެށި އޮތުމުން ކަމަށް އަޒާން ވިދާޅުވި އެވެ.
"މި ވައްކަންތައް ތަހުގީގުކޮށް މި ބޭފުޅުން ހައްޔަރުކުރަންޖެހޭ. ޖަލަށްލާންޖެހޭ، ދިގު މުއްދަތަކަށް ޖަލަށްލާންޖެހޭ،" އަޒާން ވިދާޅުވި އެވެ.
ފާއިތުވި ފަސް އަހަރު އޭރު އިދިކޮޅުގައި ތިބެ ދެއްކީ ވެރިކަން ލިބުމުން ވައްކަމާއި ޖަރީމާތައް ހިންގި ފަރާތްތަކުގެ މައްސަލަތައް ބަލާނެ ވާހަކަ ކަމަށާއި އެކަން ކުރަންޖެހޭ ކަމަށް އަޒާން ވިދާޅުވި އެވެ.
މަޖިލީހުން މިއަދު ފާސްކުރި މާލިއްޔަތު ކޮމިޓީގެ ރިޕޯޓުގައި ކުރީ ސަރުކާރުން ގެއްލުމުގެ ބަދަލުގެ ގޮތުގައި ގިނަ އަދަދެއްގެ ބަޔަކަށް ބަދަލުދިން މައްސަލާގައި ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލްގެ އިތުރަށް ރައީސް އޮފީހުގެ ކުރީގެ މިނިސްޓަރު އަލީ ޝިޔާމުގެ މައްޗަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލަށް ލަފާދިނުމަށް ވަނީ ހިމަނާފަ އެވެ.