ކުރީ ސަރުކާރުން ގެއްލުމުގެ ބަދަލުގެ ގޮތުގައި ގިނަ އަދަދެއްގެ ބަޔަކަށް ބަދަލުދިން މައްސަލާގައި ކުރީގެ ރައީސް އިބްރާހިމް މުހައްމަދު ސޯލިހުގެ މައްޗަށް ޖިނާއީ ތަހުގީގެއް ހިންގަން އުޅެނީ ސިޔާސީ ގޮތުން ބިރު ދެއްކުމުގެ ގޮތުން ކަމަށް އެމްޑީޕީން ބުނެފި އެވެ.
މަޖިލީހުން މިއަދު ފާސްކުރި މާލިއްޔަތު ކޮމިޓީގެ ރިޕޯޓުގައި ކުރީ ސަރުކާރުން ގެއްލުމުގެ ބަދަލުގެ ގޮތުގައި ގިނަ އަދަދެއްގެ ބަޔަކަށް ބަދަލުދިން މައްސަލާގައި ކުރީގެ ރައީސް ސޯލިހާއި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލްގެ އިތުރަށް ރައީސް އޮފީހުގެ ކުރީގެ މިނިސްޓަރު އަލީ ޝިޔާމުގެ މައްޗަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލަށް ލަފާދިނުމަށް ވަނީ ހިމަނާފަ އެވެ.
އެމްޑީޕީގެ ޕާލަމެންޓްރީ ގްރޫޕުން މިއަދު ބޭއްވި ނޫސްވެރިންގެ ބައްދަލުވުމުގައި ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވީ މާލިއްޔަތު ކޮމިޓީން މި މައްސަލަ ނިންމާފައިވަނީ އެއްވެސް ވަރަކަށް ފުޅާ ދާއިރާއެއްގައި މަޝްވަރާ ކުރެވިގެން ނޫން ކަމަށާއި މިއީ ސިޔާސީ ބޭނުމެއްގައި ކުރާ ކަމެއް ކަމަށެވެ. ކުރީ ސަރުކާރުން މިކަމުގައި އަމަލުކޮށްފައިވަނީ ގާނޫނީ ހަމަތަކުގެ މަތިން ކަމަށާއި އޭރު އުފައްދާފައި އޮތް ސެޓެލްމެންޓް ކޮމިޓީން ނިންމުންތައް ނިންމީ ކެބިނެޓަށް ހުށަހަޅައި ފާސްކުރުމަށްފަހު ކަމަށް ޣަފޫރު ވިދާޅުވި އެވެ.
"މިއީ ހަމަ ސިޔާސީ ގޮތުން ބިރުދައްކަން ހިންގަމުން ގެންދާ އަމަލެއް. އެއްވެސް ކަމެއް މިއަކުން ސާބިތެއް ނުކުރެވޭނެ. ސާބިތު ކުރެވޭނެ އެއްވެސް ކަމެއް އޮތްނަމަ އެ ބޭފުޅުން މިހާ ދުވަސްވަންދެން ނުތިއްބަވާނެ،" ޣަފޫރު ވިދާޅުވި އެވެ.
ކުރީ ސަރުކާރުން ހުރިހާ ކަމެއް ކޮށްފައިވާނީ އުސޫލުގެ ތެރެއިން ކަމަށާއި އުސޫލުން ބޭރުން ކޮށްފައި އޮތް އެއްވެސް ކަމެއް ނޯންނާނެ ކަމަށްވެސް އޭނާ ވިދާޅުވި އެވެ.
މާލިއްޔަތު ކޮމިޓީގެ ރިޕޯޓުގައިވާ ގޮތުން ކުރީގެ ރައީސް ސޯލިހާއި ފައްޔާޒު އަދި ޝިޔާމު، ގާނޫނުއަސާސީއާއި ގާނޫނުތަކުން އެ ބޭފުޅުންނާ މަތިކޮށްފައިވާ ޒިންމާއާ ހިލާފަށް ދައުލަަތުގެ މަތީ މަގާމުތަކުގައި ތިއްބަވައިގެން، ދައުލަތުގެ މުދަލާއި ފައިސާ އޭގެ ހައްގުވެރިން ނޫން ބަޔަކަށް ހޯދައިދިނުމަށް އެބޭފުޅުން މަސައްކަތްކުރެއްވިކަމަށް ތުހުމަތުވާ ކަމަށެވެ.
އެގޮތުން ދައުލަތަށް ގެއްލުންވާ ގޮތަށް އަމަލުކުރުމުގެ ތުހުމަތުގައި އެ ތިން ބޭފުޅުންނާމެދު ޖިނާއީ ތަހުގީގެއް ހިންގަން ފެންނަ ކަމަށް ޕްރޮސެކިއުޓާ ޖެނެރަލަށް ލަފާ އެރުވުމަށް ކޮމިޓީ ރިޕޯޓުގައި ވަނީ ހިމަނާފަ އެވެ. އަދި އެ ތަހުގީގުން ޖިނާއީ ދައުވާކުރެވޭ މިންވަރަށް ހެކި ހޯދިއްޖެނަމަ ދައުވާކުރަން ދެންނެވުމަށް ވެސް ހިމަނާފައިވެ އެވެ.
ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކޮށް، ގެއްލުމުގެ ބަދަލު ދިނުމަށް ކުރީ ސަރުކާރުން އުފެއްދި ސެޓްލްމަންޓް ކޮމެޓީ ރައީސް ޑރ. މުހައްމަދު މުއިއްޒު ވަނީ ވެރިކަމާ ހަވާލުވެވަޑައިގެން ކުޑަ ދުވަސްކޮޅެއްގެ ތެރޭގައި އުވާލާފަ އެވެ.
ސެޓްލްމަންޓް ކޮމެޓީ އުވާލިއިރު އެ ކޮމިޓީއިން އެކި ފަރާތްތަކަށް ބަދަލުގެ ގޮތުގައި 225 މިލިއަނަށް ވުރެ ގިނަ ރުފިޔާ ދިނުމަށް 17 ނޮވެމްބަރު 2023 ގެ ކުރީން ނިންމާފައިވާ ކަމަށް ރައީސް އޮފީހުން ބުނެ އެވެ.