މާލޭގައި މިއަދު ހިނގި އަލިފާނުގެ ހާދިސާއާ ގުޅިގެން މަސްވެރިންގެ ދުވަހުގެ ޖަލްސާ ފަސްކޮށްފި އެވެ.
ފިޝަރީޒް މިނިސްޓްރީން ބުނީ އަލިފާނުގެ ހާދިސާއާ ގުޅިގެން މާދަމާ ރޭ ބޭއްވުމަށް ހަމަޖެއްސި ޖަލްސާ ފަސްކޮށްފައިވާ ކަމަށާއި ޖަލްސާ ބާއްވާނެ ދުވަހެއް ފަހުން އިއުލާންކުރާނެ ކަމަށެވެ.
މާލޭގައި އަލިފާނުގެ ބޮޑު ހާދިސާއެއް ހިނގީ މިއަދުގެ ވަރަށް ހެނދުނުގެ ވަގުތެއްގައި ހައުސިން މިނިސްޓްރީގައި ރޯވި އަލިފާންގަނޑު ކޮންޓްރޯލް ނުވެ ގިނައިރުތަކެއްވެ، އިތުރު ދެ މިނިސްޓްރީއެއްގައި ވެސް ރޯވެ، އަލިފާން ފެތުރުމުންނެވެ. އެއީ ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީ އެވެ.
މި ހާދިސާގައި އެންމެ ބޮޑު ގެއްލުމެއް ލިބުނީ ހައުސިން މިނިސްޓްރީއަށެވެ. އެ މިނިސްޓްރީ ހިންގާ އިމާރާތް ވަނީ އަނދައި ހުލިވެފަ އެވެ.
އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ބައެއް ގެތަކަށް ވެސް ދުމުގެ އަސަރުކޮށްފައިވެ އެވެ. އެގޮތުން 7 ގެއަކުން 29 މީހަކު ވަގުތީ ހިޔާއަށް ބަދަލުކުރުމަށް މަސައްކަތް ކުރަމުންދާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެ އެވެ.