ކުރީ ސަރުކާރުގެ ކޮރަޕްޝަންގެ މައްސަލަތައް ބަލަން މި ސަރުކާރަށް ނުކެރޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޔާމީން މިހެން ވިދާޅުވި އިރު، ކުރީ ސަރުކާރުން ގެއްލުމުގެ ބަދަލުގެ ގޮތުގައި ގިނަ އަދަދެއްގެ ބަޔަކަށް ބަދަލުދިން މައްސަލާގައި ކުރީގެ ރައީސް އިބްރާހިމް މުހައްމަދު ސޯލިހާއި ކުރީގެ އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއިލްގެ އިތުރަށް ރައީސް އޮފީހުގެ ކުރީގެ މިނިސްޓަރު އަލީ ޝިޔާމުގެ މައްޗަށް ޖިނާއީ ތަހުގީގެއް ހިންގަން ޕްރޮސެކިއުޓާ ޖެނެރަލަށް ލަފާދިނުމަށް ރައްޔިތުންގެ މަޖިލީހުން އިއްޔެ ވަނީ ފާސްކޮށްފަ އެވެ.
ޕީއެންއެފުން ރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ މަޖިލީހުގެ ތިންވަނަ ދައުރުގައި ކޮމިޓީތަކުން ވައްކަންތަކެއް ބަލަން މަސައްކަތް ކުރި ކަމަށާއި ނަމަވެސް އޭގެއިން ކޮމިޓީއަކަށް އެމްޑީޕީ ސަރުކާރުގެ އެއްވެސް މީހަކު ގެންދިޔަތަން ފެނިފައި ނުވާއިރު، މަޖިލީހުގެ ކޮމިޓީތަކަށް މުޅިން ވެސް ގެންދިޔައީ މި ސަރުކާރުގައި ތިބި ޕީއެންސީގެ ފަރާތްތައް ކަމަށެވެ.
ކުރީ ސަރުކާރުގެ ސެޓެލްމެންޓް ކަންތައްތަކުގައި އެންމެ އިސްކޮށް އުޅުއްވީ ފައްޔާޒު ކަމަށާއި އޭނާގެ ދީލަތިކަމުގެ ދުމުގައި ނުޖެހޭ ވެރިޔަކު ޕީއެންސީގައި ނުހުންނާނެ ކަމަށް ޔާމީން ވިދާޅުވި އެވެ. އެގޮތުން ޕީއެންސީގައި މިއަދު އިސްކޮށް ތިބި ފަރާތްތަކުން ފައްޔާޒުގެ ފަރާތުން މަޝްރޫއުތައް ޓެންޑަރު މަރުހަލާ އާއި ނުލައި ނެގި ކަމަށާއި ފައްޔާޒުގެ ދީލަތިކަން ނުހިފާ މީހަކު މިއަދު އެތަނުގައި ނެތް ކަމަށްވެސް ޔާމީން ވިދާޅުވި އެވެ.
"މި މީހުންނަކަށް ނުކެރޭނެ އެމްޑީޕީގެ ވެރިކަމުގައި ހިންގާފައި ހުރި ކޮރަޕްޝަންގެ އަމަލުތައް ކަމަށް މި މީހުން މި ސިފަކުރާ، ހަމަ އެއްވެސް ކަމެއް ބަލާކަށް. އެއީ އަޅުގަނޑަށް ޔަގީން،" ޔާމީން ވިދާޅުވި އެވެ.
މަޖިލީހުން އިއްޔެ ފާސްކުރި މާލިއްޔަތު ކޮމިޓީގެ ރިޕޯޓުގައިވާ ގޮތުން ކުރީގެ ރައީސް ސޯލިހާއި ފައްޔާޒު އަދި ޝިޔާމު، ގާނޫނުއަސާސީއާއި ގާނޫނުތަކުން އެ ބޭފުޅުންނާ މަތިކޮށްފައިވާ ޒިންމާއާ ހިލާފަށް ދައުލަަތުގެ މަތީ މަގާމުތަކުގައި ތިއްބަވައިގެން، ދައުލަތުގެ މުދަލާއި ފައިސާ އޭގެ ހައްގުވެރިން ނޫން ބަޔަކަށް ހޯދައިދިނުމަށް އެބޭފުޅުން މަސައްކަތްކުރެއްވިކަމަށް ތުހުމަތުވާ ކަމަށެވެ.
އެގޮތުން ދައުލަތަށް ގެއްލުންވާ ގޮތަށް އަމަލުކުރުމުގެ ތުހުމަތުގައި އެ ތިން ބޭފުޅުންނާމެދު ޖިނާއީ ތަހުގީގެއް ހިންގަން ފެންނަ ކަމަށް ޕްރޮސެކިއުޓާ ޖެނެރަލަށް ލަފާ އެރުވުމަށް ކޮމިޓީ ރިޕޯޓުގައި ވަނީ ހިމަނާފަ އެވެ. އަދި އެ ތަހުގީގުން ޖިނާއީ ދައުވާކުރެވޭ މިންވަރަށް ހެކި ހޯދިއްޖެނަމަ ދައުވާކުރަން ދެންނެވުމަށް ވެސް ހިމަނާފައިވެ އެވެ.