ޕީއެންސީގެ ލީޑަޝިޕް ބައިބައި ނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުލްރަަހީމް އަބްދުﷲ ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަދައްކަމުން އަބްދުލްރަހީމް ވިދާޅުވީ އެމްޑީޕީ އަށް ވެރިކަމުގައި ތިބިއިރު ވެސް ޕީއެންސީގެ ލީޑަޝިޕް ބައިބައި ނުކުރެވުނު ކަމަށާއި އެކަން ދެން ވެސް ނުކުރެވޭނެ ކަމަށެވެ. އަދި ޕީއެންސީ ވެރިކަމަށް އައީ އިދިކޮޅަށް ދިޔައިރު ލީޑަޝިޕްގައި ތިބި މީހުންނަށް ވުރެ ގިނަ މީހުންނާއެކު ކަމަށް އަބްދުލްރަހީމް ވިދާޅުވި އެވެ.
"އޭރުގައި ބައިބައި ނުކުރެވުނު. މިއަދަކު ނުކުރެވޭނެ އެކަމެއް. އަޅުގަނޑުމެން މިއަދު މިތިބީ ވެރިކަމުގައި. ރައްޔިތުންގެ މަޖިލީހުގެ ސުޕަ މެޖޯރިޓީއާއެކު،" އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ ޕީއެންސީގެ ލީޑަޝިޕް އޮތީ މި ސަރުކާރަކީ މިހާތަނަށް ރާއްޖޭގައި އުފެދުނު އެންމެ ކާމިޔާބު އަދި ރައްޔިތުންގެ ތާއީދާއި ލޯބި އެންމެ ބޮޑަށް އޮތް ސަރުކާރަށް ހެދުމަށްޓަކާ އެކަތިގަނޑެއްގެ ގޮތުގައި ކަމަށެވެ. އަދި ޕާޓީ ނިޒާމުގައި ޕާޓީ އާއި ސަރުކާރާއި އޮންނަ ގުޅުން ކިތަންމެހާ ވެސް ރަނގަޅަކަށް ރައްޔިތުންނަށް ދައްކައިދޭނެ ކަމަށާއި އަދި ވެރިއެއްގެ ފަހަތުގައި އެންމެ ސާބިތުކަމާއެކު މިހާތަނަށް އޮތީ ސިޔާސީ ޕާޓީއެއްގެ ލީޑަޝިޕަކީ ޕީއެންސީގެ ލީޑަޝިޕް ކަމަށްވެސް ވިދާޅުވި އެވެ.
"އަޅުގަނޑުމެން މިތިބީ ވަރަށް ސާބިތުކަމާއެކު ރައީސް ޑރ. މުހައްމަދު މުއިއްޒުގެ ސަރުކާރު ދަމަހައްޓަން،" އަބްދުލްރަހީމް ވިދާޅުވި އެވެ.