ކާފިރުން ކިތަންމެ ބޭނުންވިޔަސް އިސްލާމްދީނުގެ ނޫރު ނިއްވައެއް ނުލެވޭނެ ކަމަށް މިއަދުގެ ހުކުރު ހުތުބާގައި ބުނެފި އެވެ
ހުތުބާގައި ބުނީ އިސްލާމް ދީނުގެ ޢަދާވާތްތެރިން އަބަދާއި އަބަދު އަންނަނީ މާތްاللهގެ ނޫރުފުޅު ނިއްވައިލުމަށް މަސައްކަތް ކުރަމުން ކަމަށާއި ކާފިރުން ކިތަންމެ ބޭނުންވިޔަސް އެ ގޮތަށް އެކަން ނުވާނޭކަން ކީރިތި ގުރުއާނުގައި އަންގަވާފައިވާ ކަމަށެވެ.
އިސްލާމް ދީން ނައްތައިލުމަށް ޓަކައި ކާފިރުން ކުރާ މަސައްކަތްތައް ބަލައި، އެ ކަމަށް ފަރުވާތެރިވެ، ސަމާލުވާން ޖެހެއެވެ. ދީނުގެ ކަންކަން މޮޅަށް އުނގެނި ޢަދާވާތްތެރިންގެ ރޭވުންތަކަށް ހޭލައި ތިބޭންޖެހޭ ކަމަށްވެސް ހުތުބާގައި ބުނެފައިވެ އެވެ.
"ކާފިރުން މަސައްކަތްކުރަމުން އަންނަނީ މުސްލިމުން އެ މީހުންގެ ދީނާ ދުރުކުރެވޭތޯއެވެ. ނަމަވެސް އަހަރެމެންގެ އަޒުމަކަށް ވާންވާނީ މަރުދުވަހަށް ދާންދެން އިސްލާމް ދީންމަތީ ސާބިތުވެ ތިބުމެވެ. އެގޮތުގެ މަތީގައި ސާބިތުވެ ތިބެއްޖެ ނަމަ އަހަރެމެން މުސްލިމުން މަގުފުރައްދައެއް ނުލެވޭނެއެވެ. އަދި އިސްލާމީ އުންމަތް ބަލިކޮށެއް ނުލެވޭނެއެވެ،" ހުތުބާގައި ބުނެފައިވެ އެވެ.
ކީރިތި ޤުރްއާނާއި ކީރިތި ރަސޫލާގެ ޠާހިރު ސުންނަތުގައި ހިފި ވަރަކުން އަހަރެމެންގެ ކަންތައްތައް މާތްﷲ އިޞްލާޙު ކުރައްވާނެ ކަމަށާއި ދެ ދުނިޔޭގެ ޢިއްޒަތާއި ޝަރަފު އެކަލާނގެ އަހަރެމެންނަށް ދެއްވާނެ ކަމަށް ހުތުބާގައި ބުންޏެވެ. ނަމަވެސް އަހަރެމެން އެއާ ދުރުވި މިންވަރަކުން އަހަރެމެންގެ ބާއްޖަވެރިކަން ގެއްލޭނެ ކަމަށާއި އިސްލާމް ދީން ދޫކޮށް، ކާފިރުކަންމަތީ މަރުގަންނަވާ މީހުން، އެމީހުން ކުރި ހުރިހައި ޢަމަލެއް ބޭކާރުވާނެ ކަމަށްވެސް ބުނެފައިވެ އެވެ.