އައްޑޫއަށް ދިމާވެފައިވާ ކަރަންޓް ކެނޑުމުގެ މައްސަލަ ހައްލު ކުރުމަށް ފެނަކަ ކޯޕަރޭޝަނުން ކުރިއަށްގެންދާ މަސައްކަތުގެ ތެރެއިން މީގެ މަހެއް ހާ ދުވަސް ކުރިން އައްޑޫ އަށް ގެނައި ދެ އިންޖީނު، މާލެ ގެންދިއުމަށް 'އަޑިން އަޑިން' މަސައްކަތް ކުރެވެމުން ދާކަމަށް ފެނަކަ ކޯޕަރޭޝަނުގެ އައްޑޫ އޮފީހުގެ އޮފިޝަލަކު އައްޑޫލައިވް އަށް މައުލޫމާތު ދެއްވައިފިއެވެ.
ނަން ހާމަނުކުރުމަށް ޝަރުތުކޮށް 'އައްޑޫލައިވް' އާއި ވާހަކަ ދައްކަމުން އޭނާ ވިދާޅުވިގޮތުގައި އަލަށް ގެނައި 2 އިންޖީނު އިންސްޓޯލް ކުރުމަށް ބޭނުންވާ އިމާރާތްތައް ހެދުމުގެ މަސައްކަތް ކުރަމުން ދަނިކޮށް، އެ އިންޖީނުތައް ވަގުތީ ގޮތުން މާލެ ގެންދިއުމަށް ވާހަކަ ދެކެވެމުންދާ ކަމަށެވެ.
" އިންޖީނުތައް އިންސްޓޯލް ކުރަން ބޭނުންވާ ތަންތަން ހެދުމަށް ތައްޔާރުވަމުން ދަނިކޮށް އެ ކޮޅުން ގުޅާފަ ބުނެފަ އޮތީ ވަގުތީ ގޮތުން އިންޖީނުތައް ފޮނުވަދޭށޭ. އެކަމާ ވާހަކަ ދެކެވެމުން ދަނީ. އަދި ފައިނަލް ވި ކަމެއް ނޭނގޭ " އޮފިޝަލް ވިދާޅުވިއެވެ.
އައްޑޫ އަށް ގެނައި ދެ އިންޖީނު މާލެ ގެންދިއުމުގެ ވާހަކަތަކެއް ދެކެވެމުން ދާއިރު ، މާލެ އަށް ކަރަންޓް ފޯރުކޮށްދޭ ސަރުކާރުގެ ކުންފުނި ސްޓެލްކޯގެ އެންމެ ބޮޑު އެއް ޖަނަރޭޓަރަށް ދިމާވެފައިވާ މައްސަލަ ހައްލުކުރުމަށް ދެހަފްތާ ވަރު ނަގާނެ ކަމަށް ސްޓްލްކޯ އިން މިއަދު ވަނީ ބުނެފައެވެ.
މިކަމާއި ގުޅޭ ގޮތުން މައުލޫމާތު ހޯދާލުމަށް ފެނަކަ ކޯޕަރޭޝަނުގެ އައްޑޫ އޮފީހުގެ އިސްވެރިންނަށް ގުޅަން މަސައްކަތް ކުރި މަސައްކަތް އެބޭފުޅުން ފޯނަށް ޖަވާބު ނުދެއްވާތީ ވަނީ ކާމިޔާބު ވާގޮތް ނުވެފައެވެ.