ރާއްޖެ އިން ޗައިނާ އަށް ކަނޑައެޅުއްވި ސަފީރު ޑރ. ފަޒީލް ނަޖީބް ސަފީރުކަމުގެ ފަތްކޮޅު، ޗައިނާގެ ރައީސް ޝީ ޖިންޕިން އަށް އަރުވައިފި އެވެ.
ފަތްކޮޅު އެރުވުން އޮތީ ބެއިޖިންގ ގައި ހުންނަ ގްރޭޓް ހޯލް އޮފް ދަ ޕީޕަލްގައި އޮތް ޚާއްޞަ ރަސްމިއްޔާތެއް ގައެވެ.
ފަތްކޮޅު އެރުވުމަށްފަހު ސަފީރު ފަޒީލް ވަނީ ރައީސް ޑރ. މުޙައްމަދު މުޢިއްޒު ގެ ފަރާތްޕުޅުންނާއި ލޮބުވެތި ދިވެހި ރައްޔިތުން ގެ ފަރާތްޕުޅުން ރައީސް ޝީ އަށާއި ޗައިނާ ގެ ރަހުމަތްތެރި ރައްޔިތުންނަށް އެންމެހެޔޮ އެދުންތަކާއި ވެދުމާއި ސަލާން ވެސް އަރިސްކުރައްވާފަ އެވެ.
ސަފީރުގެ މަގާމާ ފަޒީލް ނަޖީބް ހަވާލުވެވަޑައިގަތުމުން އެމަނިކުފާނަށް ރައީސް ޝީ ޖިންޕިން ތަހުނިޔާ ވިދާޅުވި އެވެ. އަދި ދެ ގައުމުގެ ދެމެދު އޮތް ގާތްގުޅުން އިތުރަށް ބަދަހިކުރުމުގެ މަސައްކަތުގައި އެމަނިކުފާނުގެ ފުރިހަމަ އެއްބާރުލެއްވުން ލިބިވަޑައިގަންނަވާނެކަން ކަށަވަރުކޮށްދެއްވި އެވެ.
މި ރަސްމިއްޔާތުގައި ސަފީރުގެ އަރިހުގައި އަނބިކަނބަލުން އާމިނަތު ފަރީޝާ ވެސް ބައިވެރިވެވަޑައިގެންނެވިއެވެ.
ރާއްޖެ އާއި ޗައިނާ ސިޔާސީ ގުޅުން ގާއިމުކުރީ އޮކްޓޯބަރު 14، 1972 ގަ އެވެ. ފަޒީލަކީ ރާއްޖެ އިން ޗައިނާ އަށް ކަނޑައެޅި ފަސްވަނަ ސަފީރެވެ.