މެޗް ފިކްސިން އަށް ރިޝްވަތު ނެގުމުގެ ކުށް ސާބިތުވެ ޗައިނާގެ ގައުމީ ފިރިހެން ޓީމްގެ ކުރީގެ ކޯޗް ލީ ޓައި 20 އަހަރަށް ޖަލަށް ލާން ހުކުމްކޮށްފި އެވެ.
އޭނަގެ މައްޗަށް މި ހުކުމް އައި އިރު، ދައުވާ އަށް އިއުތިރާފު ވެސް ވެފައިވެ އެވެ. އެގޮތުން މި އަހަރުގެ ކުރީކޮޅު ލީ ވަނީ މެޗް ފިކްސިން އަށް ރިޝްވަތު ނެގުމުގެ އިތުރަށް ގައުމީ ޓީމްގެ ކޯޗްކަން ހޯދަން ވެސް ރިޝްވަތު ދިން ކަމަށް ވެސް އެއްބަސްވެފަ އެވެ.
ކުރިން އެވަޓަން އަށް ކުޅެފައިވާ ލީ ޗައިނާގެ ގައުމީ ޓީމްގެ ހެޑް ކޯޗްގެ ގޮތުގައި މަސައްކަތްކުރީ ޖެނުއަރީ 2020 އިން ފެށިގެން 2021 ގެ ޑިސެމްބަރަށެވެ. ޓީމުގެ ހެޑް ކޯޗެއްގެ ގޮތުގައި މަސައްކަތް ކުރުމުގެ ކުރިން ޗައިނާގެ ހީބީ ފޯޗުން ޗައިނާ ކްލަބްގައި 2015 އިން ފެށިގެން އެސިސްޓެންޓް ކޯޗެއްގެ ގޮތުގައި މަސައްކަތް، ގައުމީ ޓީމްގެ ހެޑް ކޯޗާ ހަވާލު ފަހުން 16 މިލިއަން ޑޮލަރުގެ ރިޝްވަތު ލީ ނަގާފައިވެ އެވެ.
މިކަމާ ގުޅިގެން އޭނަގެ މައްޗަށް ކުރި ދައުވާ ސާބިތުވީ މި އަހަރުގެ މާޗް މަހުގެ ތެރޭގަ އެވެ. އަދި ކުށް ސާބިތުވުމާ ގުޅިގެން ލީ، 47، މައާފަށް ވެސް އެދިފައިވެ އެވެ.
ލީ އަށް 20 އަހަރުގެ ޖަލު ހުކުމެއް އިއްވި އިރު، މިދިޔަ ހަފުތާގެ ތެރޭގައި ޗައިނާގެ ފުޓްބޯޅައިގެ މައި އިދާރާ، ޗައިނީސް ފުޓްބޯލް އެސޯސިއޭޝަން (ސީއެފްއޭ) ގެ ތިން އޮފިޝަލަކު ވެސް ރިޝްވަތު ނަގައިގެން ޖަލަށް ލާފައިވެ އެވެ އަދި އިތުރު ގިނަ އަދަދެއްގެ ކޯޗުންތަކެއްގެ މިފަދަ މައްސަލަތަކެއް އަންނަނީ ތަހުގީގު ކުރަމުންނެވެ.