އަންހެނުން އިގުތިަސާދީ ގޮތުން ބާރުވެރިކުރުމަކީ ސަރުކާރުން އެންމެ ބޮޑު އިސްކަމެއް ދޭ އެއް އަމާޒު ކަމަށް ސޯޝަލް އެންޑް ފެމިލީ މިނިސްޓަރު ޑރ. ޢާއިޝަތު ޝިހާމް ވިދާޅުވެއްޖެ އެވެ.
މިނިސްޓްރީން ޔޫއެން އެސްކޭޕްގެ އޭޝިއަން އެންޑް ޕެސިފިކް ޓްރެއިނިނގް ސެންޓަ ފޮ އިންފޮމޭޝަން އެންޑް ކޮމިއުނިކޭޝާން ޓެކްނޮލޮޖީ ފރ ޑިވަލޮޕްމަންޓް (އޭޕީސީއައިސީޓީ) އާ ގުޅިގެން "އެމްޕަވަރިން ވިމެން އެންޓަޕްރެނަސް ތުރޫ ޑިޖިޓަލް ޓްރާންސްފޮމޭޝަން" ގެ ނަމުގައި މިއަދު ފެށި ތަމްރީން ޕްރޮގްރާމްގައި މިނިސްޓަރު ވިދާޅުވީ އަންހެނުންގެ ކުރިއެރުމަކީ ޢާއިލާތަކުގެ ކުރިއެރުން ކަމަށެވެ. އަދި ޢާއިލާތައް ކުރިއެރުމުން، މުޖުތަމަޢު ކުރިއަރައި، އިޤްތިޞާދު ވަރުގަދަވެގެން ދާނެ ކަމަށް ވިދާޅުވި އެވެ.
އެހެންވެ ޑރ. މުޙައްމަދު މުޢިއްޒު އިސް ނަންގަވައިގެން ހިންގަވާ މި ސަރުކާރުގެ މަޝްރޫޢުތަކާއި މަސައްކަތްތަކުގައި އަންހެނުންނަށް އިތުރު ފުރުޞަތުތައް ފަހިކޮށް ދެއްވުމުގެ ގޮތުން ގިނަ ފިޔަވަޅުތަކެއް އަޅަމުން އަންނަ ކަމަށް މިނިސްޓަރު ވިދާޅުވި އެވެ.
އެގޮތުން އަންހެނުން އިސްވެ ހިންގާ ވިޔަފާރިތަކަށް އެހީތެރިވުމަށް މާލީ އެހީތެރިކަން ލިބޭނެ މަގުތައް އިތުރަށް ހަރުދަނާ ކުރުމުގައި ބޮޑެތި ކުރިއެރުންތަކެއް މި ސަރުކާރުން ހޯދާފައިވާ ކަކަމަށް ދާޅުވި އެވެ.
އަންހެނުންނާއި އަންހެން ވިޔަފާރިވެރިން ބާރުވެރިކުރުމަށް، އެސްޑީއެފްސީއާ ގުޅިގެން "ފަށާ މަދަދު" ގެ ނަމުގައި އަންހެނުންނަށް ޚާއްސަކޮށްގެން ސްކީމެއް ތަޢާރަފުކޮށް، މި ލޯން ސްކީމްގެ 25 ޕަސެންޓް ނުކުޅެދުންތެރިކަން ހުންނަ އަންހެނުންނަށް ޚާއްޞަ ކުރެވިފައިވާ އިރު، ނުކުޅެދުންތެރިކަން ހުންނަ ފަރާތް ހިމެނޭ ގޮތަށް 60 ފަރާތަކަށް ލޯން ސްކީމުން ފުރުސަތު ލިބިފައިވާ ކަމަށް މިނިސްޓަރު ވިދާޅުވި އެވެ.