ހުޅުމާލޭގައި ބައެއް ޓެކްސީ ޑްރައިވަރުން ކުރިއަށްގެންދިޔަ އިހުތިޖާޖުގެ ތެރެއިން ވެހިކަލްތަކަށް ސިނަމާލެ ބްރިޖަށް ނޭރޭ ގޮތަށް ހުޅުމާލެ މަގު ބްލޮކް ކުރި މައްސަލައިގައި އިތުރު ޓެކްސީ ޑްރައިވަރަކު ހައްޔަރުކޮށްފި އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، މިދިޔަ ބުދަ ދުވަހު ޓެކްސީ ޑްރައިވަރުން ކުރިއަށް ގެންދިޔަ އިހުތިޖާޖުގައި އާންމު ދަތުރުފަތުރަށް ހުރަސް އަޅައި މަގު ބްލޮކުކޮށް ފުލުހުންގެ ދައުރު އަދާކުރުމަށް ހުރަސް އެޅި މައްސަލައާ ގުޅިގެން މއ. ނަހީދީމަންޒިލް/ މިސްބާހު ޝަރީފު (31އ)، ހައްޔަރުކޮށްފައިވާ ކަމަށެވެ. އޭނާ ހައްޔަރުކުރީ ކޯޓު އަމުރެއްގެ ދަށުން އިއްޔެ ކަމަށްވެސް ބުންޏެވެ.
ޓެކްސީ ޑްރައިވަރުން އިހުތިޖާޖު ކުރަނީ ޓެކްސީ ޑްރައިވަރުންގެ ކަންބޮޑުވުންތަކަށް ހައްލެއް ނުލިބޭ ކަމަށާ ރައީސުލްޖުމްހޫރިއްޔާއަށް ކަންބޮޑުވުންތައް ހިއްސާ ކުރުމަށް ކުރި މަސައްކަތް ކާމިޔާބު ވެފައި ނުވާ ކަމަށް ބުނެ އެވެ. ޑްރައިވަރުންގެ އެންމެ ބޮޑު ކަންބޮޑުވުމަކީ ސަރުކާރުން ޓެކްސީ ލައިނެއް ތައާރަފު ކުރާތީ އެވެ.
ސަރުކާރުން، ޓެކްސީ ޑްރައިވަރުން މަގުމަތިކޮށްފައިވާކަމަށް ބުނެ ކުރިއަށް ގެންދިޔަ މި އިހުތިޖާޖު ފުރަތަމަ ބޭއްވީ ބުދަ ދުވަހުގެ ހަވީރު ހުޅުމާލޭ ރުއްގަނޑު ސަރަހައްދުގަ އެވެ. އެހެންނަމަވެސް މި އިހްތިތާޖު އެރޭ ފަހުން ވަނީ ހުޅުމާލެއިން ބްރިޖަށް އަރަން އޮންނަ މަގާ ދިމާލަށް ބަދަލުކޮށްފަ އެވެ. ޑްރައިވަރުން ވަނީ އެ މީހުންގެ ޓެކްސީތައް ބޭނުންކޮށްގެން އެ މަގު ބަންދުކޮށް، ހައިވޭއަށް ނޭރޭގޮތް ހަދާފަ އެވެ.
ޓެކްސީ ޑްރައިވަރުންގެ މި އަމަލުގެ ސަބަބުން އާންމުންނަށް ކުރިމަތިވި އުނދަގޫތަކާއެކު ފުލުހުން ވަނީ ބައެއް ޑްރައިވަރުން ހައްޔަރުކޮށް، އެމީހުންގެ ވެހިކަލްތައް ޓޯ ކޮށްފަ އެވެ.