މިދިޔަ ބުރާސްފަތި ދުވަހު މާލޭގައި ހިނގި އަލިފާނުގެ ބޮޑު ހާދިސާގެ ތަހުގީގަށް ބޭރުގެ އެހީ ހޯދުމަށް ނިންމައިފި އެވެ.
އަލިފާނުގެ ހާދިސާއާ ގުޅިގެން ހައުސިން މިނިސްޓްރީ ހިންގާ އިމާރާތް ވަނީ އަނދައި ހުލިވެފަ އެވެ. އެކަމާ ގުޅިގެން އެ އިމާރާތުގައި ހިންގަމުން އައި ހައުސިން މިނިސްޓްރީ، ކޮންސްޓްރަކްޝަން އެންޑް އިފްރާސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ މަސައްކަތްތައް ވަނީ މެދުކަނޑާލައިފަ އެވެ. އެ ތިން މިނިސްޓްރީގެ މަސައްކަތްތައް މާދަމާ ދަރުބާރުގޭގައި ފެށުމަށް އަންނަނީ ތައްޔާރުވަމުންނެވެ.
އަލިފާނުގެ ހާދިސާއާ ގުޅޭގޮތުން ނޫސްވެރިންނާ މިއަދު ވާހަކަދައްކަމުން ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ މި ހާދިސާގެ ތަހުގީގަށް ބޭރުގެ ޓީމެއްގެ އެހީތެރިކަން ހޯދާނެ ކަމަށާއި ކުރިއަށް އޮތް ދެތިން ދުވަހެެއްގެ ތެރޭގައި އެޓީމަށް ފުލުހުންގެ ތަހުގީގު ޓީމާއެކު މަސައްކަތް ކުރެވޭނެ މިންވަރަށް ކަންކަން ހަމަޖައްސަން ސަރުކާރުގެ ކަމާއި ބެހޭ މުއައްސަސާތަކާއި ގުޅިގެން މަސައްކަތް ކުރަމުންދާ ކަމަށެވެ.
އަލިފާނުގެ ހާދިސާ ހިނގި ސަރަހައްދުގެ ވަށައިގެން ހުރި ސީސީޓީވީ ފުޓޭޖްތައް މިހާރު ހޯދާފައިވާ ކަމަށާއި އަދި މި ހާދިސާގެ މަންޒަރުތައް އެންމެ ފުރަތަމަ ދުށް ފަރާތްތަކުގެ ބަޔާންތައް ވެސް ނެގުމުގެ މަސައްކަތް މިހާރު ފެށިގެން ކުރިއަށްދާ ކަމަށް ސީޕީ ވިދާޅުވި އެވެ.
މީގެއިތުރުން މި ހާދިސާގެ މައުލޫމާތު އެނގޭ ފަރާތްތަކަށް އެ މައުލޫމާތު ފަސޭހައިން ހިއްސާކުރެވޭނެ އިންތިޒާމެއް ވަރަށް އަވަހަށް ހަމަޖައްސާނެ ކަމަށްވެސް ސީޕީ ވިދާޅުވި އެވެ.
އަލިފާނުގެ ހާދިސާއާ ގުޅިގެން އެ ސަރަހައްދުގައި ހުރި ބައެއް ގެތަކަށް ވެސް ދުމުގެ އަސަރުކޮށްފައިވެ އެވެ. އެގޮތުން 7 ގެއަކުން 29 މީހަކު ވަގުތީ ހިޔާއަށް ވަނީ ބަދަލުކޮށްފަ އެވެ.