މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ރިސާޗް ކޮންފަރެންސް މިއަދު ފަށައިފި އެވެ.
"އިގުތިސާދީ ދިރާސާތައް ފުޅާކުރުން: ދެމެހެއްޓެނެވި މުސްތަގުބަލަކަށް ސިޔާސަތާއި އީޖާދުކުރުން" މި ޝިއާރުގެ ދަށުން ކުރިއަށް ގެންދާ ކޮންފަރެސް ފެށުމުގެ ގޮތުން ގަވަރުނަރު އަހިމަދު މުނައްވަރު ވަނީ ކީ ނޯޓް ސްޕީޗެއް ވެސް ދެއްވައިފަ އެވެ.
އެމްއެމްއޭ އިން ވަނީ އެތަނުގެ ޑޭޓާ ބޭނުންކޮށްގެން ތައްޔާރުކޮށްފައިވާ އާޓުތަކަށް ވޯޓު ދިނުމުގެ ފުރުސަތު ވެސް ކޮންފަރެންސްގައި ހުޅުވައިލައިފަ އެވެ. މި އާޓް މުބާރާތުގައި ވޯޓު ދޭ ފަރާތްތަކުގެ މެދުގައި ނެގޭ ގުރުއަތަކުން ހޮވޭ ފަރާތަކަށް މި ކޮންފަރެންސްއާ ގުޅިގެން ތައާރަފުކުރާ 5،000ރ. ރުފިޔާގެ ނޯޓު ކާމިޔާބުކުރުމުގެ ފުރުސަތު އޮންނާނެ އެވެ.
މަރުކަޒީ ބޭންކްގެ ރިސާޗް ކޮންފެރެންސްގައި ގަވަރުނަރު މުނައްވަރުގެ އިތުރަށް އިންޑިޔާގެ ރިޒާވް ބޭންކު (އާރްބީއައި) ގެ ޑެޕިއުޓީ ގަވަނަރު ޑރ. މިކައިލް ޑެބަބްރަޓާ ޕަޓްރާ ވެސް ކީ ނޯޓު ތަގުރީރެއް ދެއްވާފައިވެ އެވެ. އަދި ގައުމީ ޔުނިވަސިޓީގެ ޗާންސެލަރު ޑރ. މަހުމޫދު ޝައުގީ ވެސް ވާހަކަ ދައްކަވާފައިވެ އެވެ.
އެކި ދާއިރާތަކުން ތައްޔާރުކޮށްފައިވާ ދިރާސާތައް މި ކޮންފަރެންސަށް ހުށަހަޅާނެ އެވެ.
ކޮންފަރެންސްގައި މައިގަނޑު ގޮތެއްގައި އަލިއަޅުވައިލާނީ ރާއްޖޭގެ އިގުތިސާދަށް ކުރިމަތިވެފައިވާ ގޮންޖެހުންތަކާއި، ފަހިވެފައި ހުރި އިގުތިސާދީ އެކި ފުރުސަތުތަކަށެވެ.
ރިސާޗް ޕޭޕަރުތައް ހުށަހެޅުމުގެ އިތުރަށް މަތީ ފަންތީގެ ޕެނަލް ޑިސްކަޝަންތަކެއް ކުރިއަށް ގެންދާނެ އެވެ.