ރައްޔިތުންގެ އާންމު ބޯހިޔާވަހިކަމާ ގުޅުންހުރި އެއްވެސް މައުލޫމާތެއް ގެއްލިފައިނުވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މިދިޔަ ބުރާސްފަތި ދުވަހުގެ ހެނދުނު މާލޭގައި ހިނގި އަލިފާނުގެ ހާދިސާއާ ގުޅިގެން ހައުސިން މިނިސްޓްރީ ހިންގާ އިމާރާތް ވަނީ އަނދައި ހުލިވެފަ އެވެ. އެކަމާ ގުޅިގެން އެ އިމާރާތުގައި ހިންގަމުން އައި ހައުސިން މިނިސްޓްރީ، ކޮންސްޓްރަކްޝަން އެންޑް އިފްރާސްޓްރަކްޗާ މިނިސްޓްރީ އަދި އެންވަޔަރަމަންޓް މިނިސްޓްރީގެ މަސައްކަތްތައް ވަނީ މެދުކަނޑާލައިފަ އެވެ. އެ ތިން މިނިސްޓްރީގެ މަސައްކަތްތައް މާދަމާ ދަރުބާރުގޭގައި ފެށުމަށް އަންނަނީ ތައްޔާރުވަމުންނެވެ.
އަލިފާނުގެ ހާދިސާއާ ގުޅޭގޮތުން ނޫސްވެރިންނާ މިއަދު ވާހަކަދައްކަމުން މުއްތަލިބު ވިދާޅުވީ މިހާތަނަށް ބެލި ބެލުމުން ފުދޭ ވަރެއްގެ ގިނަ ޑޭޓާތައް ރައްކާކުރެވިފައިވާކަން ފާހަގަކުރެވިފައިވާ ކަމަށާއި އެގޮތުން ބޯހިޔާވަހިކަމާއި ގުޅުން ހުރި އެއްވެސް މައުލޫމާތެއް ނުގެއްލޭ ކަމަށެވެ.
"ރައްޔިތުންނާ ގުޅުންހުރި، ސީދާ ރައްޔިތުންނާ ގުޅުންހުރި ހައުސިންއާ ގުޅުންހުރި އެއްވެސް މައުލޫމާތެއް ގެއްލިފައި ނުވާ ކަމަށް، މިހާރު ވެސް އެބަ ހުރިކަން އަޅުގަނޑުމެންނަށް ޔަގީން ކުރެވޭ،" މުއްތަލިބު ވިދާޅުވި އެވެ.
ހައުސިންގް ލޯނުތަކާ ބެހޭ މައުލޫމާތުތައް ވެސް ކްލައުޑްގައި ރައްކާކުުރެވިފައިވާ ކަމުގެ ޔަގީންކަން އެބައޮތް ކަމަށާއި ސަރުކާރުން ހިދުމަތް ދިނުމަށް ބޭނުންވާ މައުލޫމާތުތައް ރިކަވާ ކުރެވޭނެ ކަމަށްވެސް އޭނާ ވިދާޅުވި އެވެ.
އަލިފާނުގެ ހާދިސާ ހިނގި ގޮތް މިހާތަނަށް އެނގިފައި ނުވާއިރު، އެކަމުގެ ތަހުގީގަށް ބޭރުގެ އެހީ ހޯދުމަށް ވަނީ ނިންމާފަ އެވެ.