ރާއްޖޭގެ ހުރިހާ މިސްކިތްތަކެއްގެ އިމާމުން ތަމްރީނުކޮށް ނިމިފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިމާމުން ތަމްރީނު ކުރުމުގެ އެންމެފަހު ޕްރޮގްރާމް ކުރިއަށް ގެންގޮސްފައިވަނީ މާލޭގަ އެވެ. މި ބެޗްގެ ތަމްރީނު ނިމުމާއެކު މިއަހަރު ޕްލޭން ކުރި ގޮތަށް ރާއްޖޭގެ އެންމެހައި މިސްކިތްތަކުގެ އިމާމުން ތަމްރީނުކޮށް ނިމުނީ ކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ މި މަޝްރޫޢުގެ ދަށުން 818 އިމާމުން މިއަހަރު ތަމްރީނު ކުރެވިފައިވާ ކަމަށެވެ.
މި ތަމްރީނުގައި ފިޤުހާއި، ހަދީސް، ތަފްސީރު، މުޖުތަމަޢު ބިނާކުރުމުގައި މިސްކިތްތަކުގެ ދައުރާއި، އިމާމުންނާ ބެހޭ ވަޒީފާގެ ޤަވާޢިދުތައް މިފަދަ ދާއިރާތަކުން އާ މައުލޫމާތާއި ތަމްރީނު ދެވިފައިވާ ކަމަށް މިނިސްޓަރު ވިދާޅުވި އެވެ.
އިމާމުން ތަމްރީންކުރުމާއި، އިމާމުންނަށް އިތުރު ތަޢުލީމާއި ތަޖުރިބާގެ ފުރުސަތުތައް ހޯދައިދިނުމަށް ވަރަށް އިސްކަންދޭ ކަމަށް އިސްލާމިކް މިނިސްޓްރީން ބުނެ އެވެ.