ދިވެހިރާއްޖޭގެ އެންމެ ދެކުނުގައި އޮތް އައްޑޫ ސިޓީގެ ރައްޔިތުންނަކީ ވަރަށް ބޮޑެތި ގޮންޖެހުންތަކާއި ކުރިމަތިވެފައިވާ ރައްޔިތުންތަކެއް ދިރިއުޅެމުން ދާ ސިޓީއެކެވެ. ދިވެހިރާއްޖެއަށް މިނިވަންކަން ލިބުނު ފަހުން ފާއިތުވެގެން ދިޔަ 50 އަހަރު ދުވަހުގެ ތެރޭގައި ސަރުކާރުތަކުން އައްޑޫގައި ތަރައްޤީގެ ބޮޑު މަޝްރޫޢު އެއް ހިންގާފައި ނުވުމަކީ އައްޑޫގެ ހުރިހާ ރައްޔިތުންވެސް ކުރާ ޝަކުވާއެކެވެ.
މި ޝަކުވާތަކުގެ އިތުރަށް އައްޑޫގެ ރައްޔިތުން ކުރާ އެހެން ޝަކުވާއެއް ވެސް އެބައޮތެވެ. އައްޑޫގައި ޤާއިމުކުރެވޭ ވަޞީލަތްތައް 'ވަގުތީ ގޮތުން' ކަމަށް ބުނެ، މާލެ ގެންދާ ގެންދިއުމެވެ.
ކުރީގެ ރައީސް މުޙައްމަދު ނަޝީދުގެ ވެރިކަމުގެ ދުވަސްވަރު އައްޑޫގައި ސާކްސަމިޓަށް ބިނާކުރި އީސީސީ އަށް ގެނައި ގިނަ އަދަދެއްގެ ސާމާނުތައް ވެސް ވަނީ 'ވަގުތީ ގޮތުން' މާލެ ގެންދެވިފައެވެ. އެމްޑީޕީ ސަރުކާރުގެ ދުވަސްވަރު މާލެ އަށް އެތަކެތި ގެންދިޔައީ ސަރުކާރުން އޭރު ބުނި ގޮތުގައި ފަހުން އައްޑޫ އަށް ފޮނުވާ ގޮތަށެވެ.
އިނގިރޭސިން އައްޑޫގައި ތިބެފައި ދިޔަ ފަހުން، ފާއިތުވެގެން ދިޔަ 50 އަހަރު ދުވަހުގެ ތެރޭގައި ދިވެހިރާއްޖޭގެ ސަރުކާރުން އައްޑޫ "ވީރާނާ" ކުރުމުގެ ސަޤާފަތެއް ގެންގުޅޭ ކަމަށް ގިނަ ބަޔަކު ގެންދިޔައީ އަބަދުވެސް ފާހަގަކުރަމުންނެވެ. އެ ވާހަކަތައް އަނެއްކާވެސް މިވަނީ ވަރަށް ބާރަށް ދެކެވެން ފަށާފައެވެ. މިފަހަރު، މިނިވަން50 ގެ ހަރަކާތްތަކަށް އައްޑޫ ސިޓީގެ އީސީސީގައި ހުރި ގޮނޑިތައް މާލެ ގެންދިއުމާއި ގުޅިގެންނެވެ.
ގޮނޑިތައް ގެންދިޔަ މައްސަލައިގައި ކަންބޮޑުވުން ފާޅުކުރަމުން ދަނިކޮށް މިއަދު އިވިގެން ދިޔައީ، ދާދި ފަހުން އައްޑޫ އަށް ގެނައި 2 އިންޖީނެއް "ވަގުތީ ގޮތުން" މާލެ ގެންދަން ނިންމާފައިވާ ވާހަކައެވެ.
މި ހުރިހާ ފަހަރަކުވެސް ކަންބޮޑުވެ ސޯޝަލް މީޑީޔާގައި އާއި ސައިހޮޓަލްތަކުގައި ދެކޮޅު ހަދައި ވާހަކަދައްކަނީ އާންމު ރައްޔިތުންނެވެ. އައްޑޫ ސިޓީގެ ރައްޔިތުން އެމީހުންގެ ޙައްޤުގައި މަސައްކަތްކުރުމަށް ހޮވި ކައުންސިލަރުންގެ ފަރާތުން ކަންބޮޑުވުމެއް ފެނިގެން ނުދެއެވެ.
ފެނަކަ ކޯޕަރޭޝަނުގެ ބިމުން ކުލި ނަގާނެ ކަމަށާއި ފެނަކަ ނޫން ބަޔަކަށް އައްޑޫގެ ކަރަންޓުގެ ޚިދުމަތް ދިނުން ހުޅުވާލާނެ ކަމަށް ވިދާޅުވިޔަސް ކައުންސިލްގެ ނިޔަތް އެހާ ސާފު ނޫންކަން މިވަނީ ހާމަވެގެން ގޮސްފައެވެ. ފެނަކަ އާއި ދެކޮޅަށް ވާހަކަ ދެއްކުމަށް ފަހު ޖެހިގެން އަންނަ ދުވަހު ކައުންސިލްގެ ފިނި ކޮޓަރި ތަކުގައި ތިއްބަވައިގެން ހިނިފުޅުވަޑުވައި 'އެއްބާރުލުން ދިނުމުގެ އެއްބަސްވުންތަކުގައި' ސޮއި ކުރަނީ ރައްޔިތުންނަށް ޖެއްސުން ކުރުމުގެ ގޮތުން ނޫން ބާއެވެ؟
މިއަދު އެހެރަ ގެންދަނީ، އައްޑޫ ސިޓީގެ ކަރަންޓުގެ މައްސަލަ ހައްލުކުރުމަށް ގެނައި 2 އިންޖީނެވެ. ކައުންސިލްގެ ބޭފުޅަކަށް އެކަމާއި ގުޅިގެން މުޒާހަރާއަކަށް ރައްޔިތުން ގޮވައިގެން ނިކުންނަވާކަށް ކެރިވަޑައެއް ނުގަންނަވައެވެ. އެހެން ނަމަވެސް ކައުންސިލަރުން ވިދާޅުވާ ގޮތުން ނަމަ އެމީހުންގެ އަމިއްލަ ޚަރަދުގައި ޓިކެޓް ނަންގަވައިގެން ވެސް ކުރީގެ ރައީސް ނަޝީދު މިނިވަން ކުރުމަށް މުޒަހަރާ ކުރަން މާލެ އެބަދެވެއެވެ.
ރައްޔިތުން ތިބޭފުޅުން ތި މަޤާމްތަކަށް ހޮއްވަވާފައި ތިބީ، ތިބޭފުޅުންގެ ކިބައިގައި މުޒާހަރާ ކުރުމުގެ ހުނަރު ހުރިކަން ވެސް އެނގިގެންނެވެ. އެހެން ކަމުން ރައްޔިތުންގެ ޙައްޤުގައި ނިކުންނަން ޖެހިލުންވާންވީ ކީއްވެގެން ހެއްޔެވެ ؟ ސަރުކާރު ދެކެ ޖެހިލުންނުވާ ކަމަށް ވެސް ވިދާޅުވަނީ ތިބޭފުޅުންނެވެ. އެހެން ކަމަށް ވާނަމަ ރައްޔިތުންނާއި ގުޅުން ހުރި މައްސަލަ ތަކުގައި ވަރިހަމަ ވެގެން ތިޔަ ތިއްބަވަނީ ކީއްވެގެން ތޯއެވެ ؟