ބްރާސްފަތި ދުވަހު ހިނގި އަލިގފާނުގެ ހާދިސާއާ ގުޅިގެން ދަރުބާރުގެއަށް މަސައްކަތްތައް ބަދަލުކުރި ތިން މިނިސްޓްރީން ހިދުމަތް ދެމުންދާގޮތް ރައީސް ޑރ. މުހައްމަދު މުއިއްޒު ބައްލަވާލައްވައިފި އެވެ.
ހައުސިން މިނިސްޓްރީގައި ހިނގި އަލިފާނުގެ ހާދިސާއާ ގުޅިގެން އެ މިނިސްޓްރީއާއި ކްންސްޓްރަކްޝަން މިނިސްޓްރީ އަދި އެންވަޔަރަމެންޓް މިނިސްޓްރީއަށް ބޮޑެތި ގެއްލުންތަކެއް ލިބިފައިވެ އެވެ.
މި ތިން މިނިސްޓްރީގެ މަސައްކަތްތައް ދަރުބާރުގެއަށް ބަދަލުކޮށް ހިދުމަތްދޭން ފަށާފައިވަނީ އިއްޔެ އެވެ.
އެތަނަށް ވަޑައިގެން މިއަދު ރައީސް މުއިއްޒު ވަނީ ހިދުމަތްދެމުންދާގޮތް ބައްލަވާލައްވާ އަދި މުވައްޒަފުންނާވެސް ބައްދަލުކުރައްވާފަ އެވެ. މުވައްޒަފުންނާ މުޚާތަބުކުރައްވަމުން ރައީސް މުއިއްޒު ވަނީ، އަލިފާނުގެ ހާދިސާއާއި ގުޅިގެން ލިބިގެން ދިޔައީ އަގު ނުކުރެވޭނެވަރުގެ ބޮޑު ގެއްލުމެއްކަން ފާހަގަކުރައްވާފައެވެ. މި ގެއްލުމުގެ ސަބަބުން މުވައްޒަފުންގެ އަމިއްލަ ތަކެތި ގެއްލިގޮސްފައިވާކަން ފާހަގަކުރައްވައި ރައީސް ވަނީ މި ހާލަތުގައިވެސް މުވައްޒަފުންގެ ފަރާތުން ފެނިގެންދިޔަ ކެތްތެރިކަން އަދި މަސައްކަތްތައް އަލުން ފެށުމަށްޓަކައި ދެއްވި އެއްބާރުލުން ފާހަގަކުރައްވާފަ އެވެ.
ރައީސް މުއިއްޒު ވިދާޅުވީ ވީހާވެސް އާންމު ހާލަތަކަށް އޮފީސް މާހައުލު ހެދުމަށްޓަކައި ސަރުކާރުގެ މުވައްސަސާތަކާ ގުޅިގެން މަސައްކަތްތަކެއް ކުރައްވަމުންދާކަމަށެވެ. އެގޮތުން ފާހާނަ އިތުރުކުރުމަށާއި، ކެފެޓީރިއާގެ ޚިދުމަތް ދިނުމަށާއި، ދެންވެސް މަދުވާ އިލެކްޓްރޯނިކްސް، ކޮމްޕިއުޓަރ ސިސްޓަމްފަދަ ތަކެތި ހޯއްދެވުމަށް މަސައްކަތްތަކެއް ކުރައްވަމުންދާކަމުގައި ވިދާޅުވިއެވެ.