ދިވެހިރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު ކަމަށް ފުއާދު ތައުފީޤް މިއަދު އައްޔަނުކުރައްވައިފި އެވެ.
ފުއާދު ތައުފީޤަށް މަޤާމުގެ ފަތްކޮޅު ރައީސް ޑރ. މުހައްމަދު މުއިއްޒު އެރުވީ އެކަމަށްޓަކައި ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށް ގެންދިޔަ ރަސްމިއްޔާތުގަ އެވެ.
ތައިލެންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް އައްޔަނުކުރެއްވުމުގެ ކުރިން ފުއާދު ހުންނެވީ މިނިސްޓްރީ އޮފް ފޮރިން އެފެއާޒްގެ އެމްބަސެޑާ އެޓް ލާޖްގެ މަޤާމުގައެވެ.
ތައިލެންޑް ސަފީރުކަމަށް ފުއާދު އައްޔަނު ކުރުމަށް މަޖިލީހަށް ފޮނުވާފައިވަނީ މިދިޔަ މަހުގެ 25 ވަނަ ދުވަހު އެވެ. މަޖިލީހުން ފުއާދުއަށް ރުހުން ދީފައިވަނީ 58 މެންބަރުންގެ އިއްތިފާގުންނެވެ.
އިލެކްޝަންސް ކޮމިޝަނުގައި ދެ ދައުރު ހަމަކުރެއްވުމަށްފަހު ފުއާދުގެ ދައުރު ހަމަވެފައިވަނީ ނޮވެމްބަރު މަހުގެ 23 ވަނަ ދުވަހު އެވެ.