މަތީ ތަޢުލީމު ހާޞިލުކުރާ ކޮންމެ ދަރިވަރަކީ އެ ދަރިވަރެއްގެ ކުޅަދާނަކަމާއި ޤާބިލްކަމާއި މެދު ޝައްކު ނުއުފެދޭ ފަދަ ދަރިވަރަކަށްވުމަށް ހަޔާ އެޑިއުކޭޝަން މިނިސްޓަރު ޑރ. މަރްޔަމް މާރިޔާ ގޮވާލައްވައިފި އެވެ.
ވިލާ ކޮލެޖްގެ އައްޑޫ ހިތަދޫ ކެމްޕަސް ހުޅުވަން މިއަދު ބޭއްވި ރަސްމިއްޔާތުގައި މިނިސްޓަރުވިދާޅުވީ، ވިލާ ކޮލެޖަކީ އައްޑު އަށް ތައުލީމީ ގޮތުން މިހާތަނަށް އެތަށް ޚިދުމަތްތަކެއް ފޯރުކޮށް ދީފައިވާ ކޮލެޖެއް ކަމަށާއި، މިއަދު ހުޅުވި ކެމްޕަހަކީ އެންމެ ޒަމާނީ ވަސީލަތްތަކާ އެކު ހުޅުވުނު ތަނެއް ކަމަށެވެ.
"މަތީތަޢުލީމުގެ ހިޔާވަހިކަމުގެ ދަށުން ދަސްވެނިވެގެން ނިކުންނަ ކޮންމެ ދަރިވަރަކީ، އެ ދަރިވަރެއްގެ ކުޅަދާނާނަކަމާމެދު ސުވާލުނު އުފެދޭނެ ފަދަ ދަރިވަރަކަށްވުން މުހިންމު. ވަޒީފާއަކަށް ދިޔަނަމަ، ވަޒީފާ ދިންފަރާތް މާޔޫސްނުވާފަދަ ހުނަރުހުރި ދަރިވަރަކަށް ކޮންމެ ދަރިވަރަކުވެސް ވުން ބޭނުންތެރި،" މިނިސްޓަރު ވިދާޅުވި އެވެ. "ވަޒީފާއެއް އަދާކުރަން ބޭނުން ނެތް ނަމަ އަމިއްލަ މަސައްކަތަކުން ދިރިއުޅުން އާރާސްތު ކުރެވޭ ފަދަ ހުނަރުވެރި ދަރިވަރަކަށްވުމަކީ އަޒުމް ކަމުގައި ކޮންމެ ދަރިވަރަކުވެސް ހަދަން ވާނެ."
މިނިސްޓަރު މާރިއާ ވަނީ މަތީ ތަޢުލީމުގެ ދާއިރާގެ ކުރިއެރުމަށް މަސައްކަތްކުރާ ފަރާތްތަކުގެ އެންމެ ކުރީ ސަފުން ވިލާ ކޮލެޖް ޖާގަ ހޯދާފައިވާކަން ފާހަގަ ކުރައްވައި އެހެނިހެން އަމިއްލަ ފަރާތްތަކުން މަތީ ތަޢުލީމު ކުރިއެރުވުމަށް އެތަށް އަގުހުރި މަސައްކަތްތަކެއް ކުރަމުން އަންނަ ކަމަށް ވިދާޅުވެފަ އެވެ.