އައްޑޫ ސިޓީއަށް މީގެ މަހެއްހާ ދުވަސް ކުރިން ގެނައި 2 މެގަވޯޓުގެ އިންޖީނުތައް މިނިވަން50ގެ ބޭނުންތަކަށް މާލެ ގެންދިއުމަށް ނިންމާފައިވާ ވާހަކަ ފެނަކައިގެ ފަރާތުން ހާމަކޮށްފައި ވިޔަސް އެތަކެތި ގެންދަނީ ހުޅުމާލޭ އިންޖީނުގޭގައި ބޭނުންކުރުމަށް ކަން އިތުބާރު ހުރި ގޮތެއްގައި 'އައްޑޫލައިވް' އަށް ކަށަވަރުވެއްޖެއެެވެ.
ފެނަކަ ކޯޕަރޭޝަނުގެ ފަރާތުން ބުނެފައިވާ ގޮތުގައި، އައްޑޫގައި ހުރި 2 އިންޖީނު މާލެ ގެންދަނީ ސްޓެލްކޯ އިން ކަރަންޓް ދެމުން އަންނަ މާލެ އަށް މި ދުވަސްކޮޅު މާލެ އަށް ކަރަންޓް ދޭން ބޭނުން ކުރާ އެންމެ ބޮޑު ޖަނަރޭޓަރަށް މައްސަލައެއް ޖެހިފައިވުމާއި އަދި "މިނިވަން 50" ގެ ހަރަކާތްތަކާ ދިމާކޮށް މާލޭގައި ކަރަންޓް ބޭނުން ކުރާ މިންވަރު އިތުރުވެގެން ދާނެތީ ވަގުތީ ގޮތުން ވެސް މާލެ އަށް ހައްލެއް ބޭނުންވާތީ ކަމަށެވެ.
ނަމަވެސް އައްޑޫ އިންޖީނުގޭގައި މަސައްކަތް ކުރައްވާ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި، އައްޑޫ އިން މާލެ ގެންދާ 2 އިންޖީނު ސްޓެލްކޯގައި މިމަހުގެ 26 ވަނަ ދުވަހުގެ ކުރިން ސްޓެލްކޯގެ މާލޭ އިމާރާތުގައި އިންސްޓޯލް ނުކުރެވޭނެކަމަށެވެ.
" މިދައްކަނީ ކުޑަ ޖަނެރޭޓަރެއް ތެޔޮ އަޅާފައި ގޮސް ބިންމަތީގައި ބަހައްޓާ ވާހަކައެއް ނޫން. 100 ޓަނުގެ ބަރު އިންޖީނުތަކުގެ ވާހަކަ. 2 ދުވަހުން ނުވަތަ އެއް ދުވަހުން އިންސްޓޯލް ކުރެވޭނެ ނަމަ އައްޑޫގައި ވެސް އެކަން ކުރެވުނީސް. " އިންޖީނުގޭގައި މަސައްކަތް ކުރާ މުވައްޒަފަކު ބުންޏެވެ.
އޭނާ އިތުރަށް ބުނިގޮތުގައި، މިފަދަ އިންޖީނުތަކަކީ ބަހައްޓާއިރު ވަރަށް ބެލެންސްކޮށް އަދި އެކަށީގެންވާ ކޫލިން ސިސްޓަމެއް ވެސް ޤާއިމް ކުރުމަށް ފަހު ބަހައްޓަން ޖެހޭ އިންޖީނުތައް ކަމަށެވެ. 'އައްޑޫލައިވް' އަށް އެނގިފައިވާ ގޮތުގައި އައްޑޫ އިން ގެންދާ 2 އިންޖީނު ބަހައްޓާނެ ތަނެއް ތައްޔާރުކުރުމުގެ މަސައްކަތެއް ސްޓެލްކޯގެ މާލޭ އިންޖީނުގޭގައި ކުރިއަށް ނުދާކަމަށް ވެއެވެ. އެހެން ކަމުން މިއަދު އައްޑޫ އިން 2 އިންޖީނު ހިފައިގެން މާލެ އަށް ފުރިކަމުގައި ވިޔަސް މިމަހުގެ 26 ވަނަ ދުވަހު މާލޭގައި ހުރި އިންޖީނުގެއެއްގައި ބޭނުންކުރުމަށް އިންޖީނުތައް އިންސްޓޯލް ކުރެވިދާނެ ކަމާއި މެދު މިދާއިރާގައި ގިނަ ދުވަހު މަސައްކަތް ކުރައްވާފައިވާ ބޭފުޅުން ސުވާލު އުފައްދައެވެ.
ފެނަކަ ކޯޕަރޭޝަނުގެ ޑިރެކްޓަރ މުހައްމަދު ނިމާލް ބައެއް މީޑިޔާތަކަށް މައުލޫމާތު ދެމުން ވިދާޅުވެފައިވާ ގޮތުގައި، އައްޑޫ އިން މާލެ އަށް އިންޖީނުތައް ގެންދަނީ މިނިވަން50ގެ ހަރަކާތްތަކުގައި ބޭނުންކުރުމަށް ކަމަށް ބުނެ ވާހަކަދައްކައިފައެވެ.
ހުޅުމާލޭން ކަރަންޓް ދިއުން އާންމުވެފައި ވާއިރު، ސްޓެލްކޯއިން ނެރުނު ބަޔާނެއްގައި ބުނެފައިވާ ގޮތުގައި ހުޅުމާލޭން ކަރަންޓް ކެނޑެނީ ޖަނެރޭޓަރު ސިސްޓަމަކަށް ދިމާވި މައްސަލައެއްގެ ސަބަބުން ކަމަށާއި އަދި މަރާމާތު ކުރެވޭނެ ތާރީޚެއް ބުނަން ނޭނގޭ ކަމަށް ވަނީ ބުނެފައެވެ. އިތުބާރު ހުރި ގޮތެއްގައި 'އައްޑޫލައިވް' އަށް އެނގިފައިވާ ގޮތުގައި ހުޅުމާލޭގައި ހުންނަ ސްޓެލްކޯގެ އިންޖީނުގޭގައި ބޭނުންކުރަމުންދާ އިންޖީނުތަކުގެ ތެރެއިން މައްސަލަ ޖެހިގެން އުޅެނީ އައްޑޫއަށް ގެނެސްފައިވާ ބްރޭންޑްގެ އިންޖީނުތަކެއްގައެވެ.
އަދި އައްޑޫ އިން މާލެ ގެންނަ ދެ އިންޖީނަކީ ބާޒާރުގައި ގަންނަން ލިބެން ހުންނަ އިންޖީނުތަކެއް ނޫން ކަމަށާއި، ޖެހެނީ އޯޑަރުކޮށްގެން ތައްޔާރުކުރަން ކަމަށް ފެނަކަ ކޯޕަރޭޝަނުގެ ފަރާތުން މީގެ ކުރިން ބުނެފައިވާއިރު، އިންޖީނުތައް ގެންނަނީ ހުޅުމާލޭގެ އިންޖީނުގޭގައި ބޭނުންކުރުމަށް ކަމަށް ބެލެވެއެވެ.
ސްޓެލްކޯ އިން އިއްޔެ ބުނެފައިވާ ގޮތުގައި، އައްޑޫސިޓީން ގެންނަ ޖަނަރޭޓަރުތައް މާލޭގައި ބޭނުން ކުރަނީ ވަގުތީ ގޮތުން ކަމަށާއި، މިނިވަން ފަންސާހުގެ ހަފްލާތައް ނިމުމުން އަނބުރާ އައްޑޫއަށް އެ ޖަނަރޭޓަރުތައް ފޮނުވުމަށް ނުވަތަ އޭގެ ބަދަލުގައި ފެނަކައަށް އެފަދަ އެހެން ޖަނަރޭޓަރުތަކެއް ދިނުމަށް ވިސްނަވާ ކަމަށެވެ.