ރާއްޖޭގައި އިސްލާމް ދީން ކުރިއަރުވަން މަސައްކަތް ކުރަމުން އަންނަ އެންމެ ފާހަގަކޮށްލެވޭ ޖަމިއްޔާ ކަމަށްވާ ސަލަފުން އަލީ ރަމީޒު އިސްތިއުފާ ދީފި އެވެ.
އޭނަ މި ވާހަކަ ސޯޝަލް މީޑިއާގައި ރޭ ހިއްސާކުރި ނަމަވެސް އެކަމާ ގުޅޭ އިތުރު އެއްވެސް އެއްޗެއް ބުނެފައެއް ނުވެ އެވެ. އަލީ ރަމީޒަކީ ސަލަފްގެ ހަރަކާތްތަކުގައި މިހާތަނަށް ވަރަށް އިސްކޮށް އުޅެމުން އައި މީހެކެވެ.
ރާއްޖޭގައި އުފެދުނު އެންމެ ކުޅަދާނަ އަދި އެންމެ މަޝްހޫރު ލަވަކިޔުންތެރިންގެ ތެރޭގައި ހިމެނެނު އަލީ ރަމީޒު 2003 ގައި މިއުޒިކް ދޫކޮށްލައި ދިރިއުޅުމަށް ގެނައި އިސްލާހީ ބޮޑު ބަދަލާ އެކީ އޭނަ ފަހުން މުޅިން ވެސް ހަރަކާތްތެރިވަމުން އައިސްފައި ވަނީ އަމިއްލަ ވިޔަފާރި އާއި ދީނީ ހޭލުންތެރިކަން އުފެއްދުމުގެ މަސައްކަތްތަކުގަ އެވެ.
ރާއްޖޭގައި މިހާރު މަގުބޫލު ދީނީ ޗެނެލް ކަމަށްވާ "ދާރިސް" ޓީވީ އަކީ އަލީ ރަމީޒް ހިއްސާވެގެން ހިންގަމުން އަންނަ ޗެނެލެކެވެ. އެ ޗެނެލްގެ އެކިއެކި ޕްރޮގްރާމްތައް އޭނަ ހޯސްޓް ވެސް ކުރެ އެވެ. އޭގެ ތެރެއިން އެންމެ ފާހަގަކޮށްލެވޭ އެއް ޕްރޮގްރާމަކީ "އިލްމީ ޚަޒާނާ" އެވެ.