"ބިންވެރިޔާ" އާއި "ގެދޮރުވެރިޔާ" ސްކީމާ ގުޅޭ މައްސަލައިގެ ތަހުގީގެއް މިހާރު ކުރިއަށްދާތީ އެ ތަހުގީގަށް ބޭނުން ކުރެވިދާނެ ކަމަށް ބެލެވޭ މައުލޫމާތު އާންމުން، ފުލުހުންނާ ހިއްސާކޮށް ދޭން އެދިއްޖެ އެވެ.
ފުލުހުން ބުނީ މައްސަލައިގެ ތަހުގީގުގަށް ބޭނުން ކުރެވިދާނެ ކަމަށް ބެލެވޭ އެއްވެސް މައުލޫމާތެއް ނުވަތަ ހެކީގެ ގޮތުގައި ބޭނުން ކުރެވިދާނެ އެއްވެސް ލިޔުމެއް އޮތް ނަމަ މި ޕޯޓަލް evidence.police.gov.mv މެދުވެރިކޮށް ހިއްސާކޮށް ދޭން އެދޭ ކަމަށެވެ.
އެގޮތުން މައުލޫމާތާއި ހެކި ހިއްސާކުރާ އިރު އަމިއްލަ މައުލޫމާތު ހާމަނުކޮށް ވެސް ހުށަހެޅޭނެ އެވެ. އަދި ތަހުގީގުކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާ އެކު ވެސް ހިއްސާކުރެވިދާނެ ކަމަށް ފުލުހުން ބުންޏެވެ.
ފުލުހުން ބުނީ ޕޯޓަލް މެދުވެރިކޮށް މައުލޫމާތު ހުށަހަޅާ ފަރާތްތަކުގެ ސިއްރުކަން ހިފަހައްޓާނެކަމުގެ ޔަގީންކަން ވެސް ދޭ ކަމަށެވެ.
"ބިންވެރިޔާ" އާއި "ގެދޮވެރުވެރިޔާ" ސްކީމާ ގުޅޭ ތަހުގީގެއް ފެށީ ހައްގު ނުވާ ބަޔަކަށް ގަވާއިދާ ހިލާފަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބިން ދޫކުރި މައްސަލައެއް ފެންމަތިވުމާ ގުޅިގެންނެވެ. މި މައްސަލައިގައި ޝާމިލުވާ ކަމަށް ބެލެވޭ 20 މީހެއްގެ ޕާސްޕޯޓް ވެސް މިހާރު ހިފަހައްޓާފައިވާ އިރު، އެ މީހުން ތިބި މަގާމުތަކުން ސަސްޕެންޑް ވެސް ކޮށްފައިވެ އެވެ.
އޭގެ ތެރޭގައި ހިމެނޭ އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދު ރޭ ވަނީ މަގާމުން އިސްތިއުފާ ދެއްވައި އެވެ.
ފުލުހުންގެ އިތުރުން އެންޓި-ކޮރަޕްޝަން ކޮމިޝަން (އޭސީސީ) އިން ވެސް އަންނަނީ "ބިންވެރިޔާ" އާއި "ގެދޮރުވެރިޔާ" ސްކީމާ ހުޅޭ ތަހުގީގެއް ހިންގަމުންނެވެ.