ހައުސިން ޑިވެލޮޕްމަންޓް ކޯޕަރޭޝަން އެޗްޑީސީގެ މެނޭޖިން ޑިރެކްޓަރުގެ މަގާމަށް މުހައްމަދު މައުރޫފް ޖަމީލު އައްޔަނު ކުރައްވައިފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)އިން މިއަދު ބުނެފައިވަނީ އެޗްޑީސީގެ މެނޭޖިން ޑިރެކްޓަރުގެ މަގާމަށް މ. ދޫރެސް، މުހައްމަދު މައުރޫފް ޖަމީލު މިއަދު އައްޔަނު ކުރައްވާފައިވާ ކަމަށެވެ.
މައުރޫފް ޖަމީލު ވަނީ ކުރީގެ ރައީސް މައުމޫންގެ ސަރުކާރުގައި ހުޅުމާލެ ޑިވަލޮޕްމެންޓް ކޯޕަރޭޝަންގެ ސީއީއޯގެ މަގާމު ދުވަސްކޮޅަކަށް އަދާކުރައްވާފަ އެވެ. އަދި އޭގެފަހުން ރައީސް މައުމޫންގެ ސަރުކާރުގައި ކޮންސްޓްރަކްޝަން މިނިސްޓަރުކަންވެސް ކުރައްވާފައިވެ އެވެ.
އެޗްޑީސީގެ އެމްޑީގެ މަގާމު ހުސްވީ އެ މަގާމުގައި ހުންނެވި އިބްރާހިމް ފަޒުލް ރަޝީދު ރޭ މަގާމުން އިސްތިއުފާ ދެއްވުމުންނެވެ.
ފަޒުލް އިސްތިއުފާ ދެއްވީ، ކުރީ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއު ކަމަށްވާ "ބިންވެރިޔާ ސްކީމް"ގެ ބޭރުން ގޯތިތަކެއް ދިން ކަމަށް ތުހުމަތުވާ ކޮރަޕްޝަންގެ މައްސަލަ ފުލުހުންނާއި އޭސީސީން ތަހުގީގު ކުރަމުންދަނިކޮށެވެ. މި މައްސަލައިގައި ފަޒުލްގެ ބޭބެއަށް ބިންވެރިޔާ ސްކީމުން ގޯއްޗެއްގެ ރެޖިސްޓްރީއެއް ހަދާފައިވާ މައްސަލައެއްވެސް ފެންމަތިވި އެވެ.
މީގެއިތުރުން މިމައްސަލައިގެ ތަހުގީގަށް 20 މީހަކު ފުރުން މަނާކޮށް ޕާސްޕޯޓްވެސް ވަނީ ހިފަހައްޓާފަ އެވެ. އޭގެތެރޭގައި ފަޒުލް އަދި އޭނާގެ ބޭބެވެސް ހިމެނެ އެވެ. މަގާމުން އިސްތިއުފާ ދެއްވިއިރު ފަޒުލް ހުރީ ސަސްޕެންޑްވެސް ކޮށްފަ އެވެ.
އިސްތިއުފާގެ ސިޓީގައި ފަޒުލް ވަނީ އޭނާއަށް ކުރެވޭ ތުހުމަތުތަކަށް އިންކާރު ކޮށްފަ އެވެ. އަދި މަގާމުން އިސްތިއުފާ ދެނީ ތަހުގީގަށް ފުރުސަތު ދިނުމަށާއި، ކުންފުންޏާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިޔުމަށް ފުރުސަތު ދިނުމުގެ ގޮތުން ކަމަށެވެ.