އައްޑޫ ސިޓީ އިން މާލެ އަށް 131،000 ލީޓަރުގެ ޕްޓްރޯލް ގެންދިޔަކަމަށް ސޯޝަލް މީޑިޔާގައި ބައެއް ފަރާތްތަކުން ފަތުރަމުން ގެންދާ ޙަބަރު އެސްޓީއޯ އިން ދޮގޮކޮށްފިއެވެ.
'އައްޑޫލައިވް' އިން ދެންނެވި ސުވާލަކަށް ޖަވާބު ދެއްވަމުން އެސްޓީއޯގެ އޮފިޝަލަކު ވިދާޅުވި ގޮތުގައި އައްޑޫ ސިޓީއިން މާލެއަށް ޕްޓްރޯލް ގެންދިޔަކަމަށް ދެކެވޭ ވާހަކައަކީ ދޮގެއް ކަމަށާއި އައްޑޫ ސިޓީއަށް ބޭނުންވާ ވަރަށް މިހާރުވެސް އައްޑޫގައި ހުރި ޓޭންކް ތަކުގައި ޕްޓްރޯލް އެބަހުރި ކަމަށެވެ.
މިދުވަސްވަރު މާލޭން ޕެޓްރޯލާއި ޑީސަލް ލިބުމުގައި ދަތިތަކެއް އުޅޭ ކަމަށް ވާހަކަދެކެވެމުން ދާއިރު ޕެޓްރޯލް އަޅަން ކިއޫގައި ޖެހޭ މިންވަރު ވަނީ އާދަޔާ ހިލާފަށް އިތުރުވެފައެވެ. އެގޮތުން ރޭ ވެސް މާލޭގައި ޕެޓްރޯލް ޝެޑްތަކުގެ ކައިރީގައި ދިގު ކިޔޫތަކެއް ހަދާފައިވާއިރު، ޕެޓްރޯލް ވިއްކާ ބައެއް ފަރާތްތަކުން ލިމިޓްކޮށްގެން ޕެޓްރޯލް ވިއްކާފައިވާކަން ފާހަގަކުރެވެއެވެ.
އެސްޓީއޯގެ ފަރާތުން ބުނެފައިވާ ގޮތުގައި ޕެޓްރޯލް ޝެޑުތަކުން ކުރިން ވެސް ވިއްކަނީ މީހަކަށް ގިނަވެގެން ފަސް ލީޓަރުގެ ޕެޓްރޯލް އަދި 20 ލީޓަރުގެ ޑީސަލްގެ މަގުން ކަމަށާއި އެއީ އަބަދު ވެސް އޮންނަ އުސޫލު ކަމަށެވެ.
މީގެ އިތުރުން ކުންފުނިން ތެޔޮ ގަނެގެން ވިއްކައި ސަޕްލައި ކުރާ ކުންފުނިތަކަށް ވެސް އެއްވެސް ހައްދެއް ނެތި، ކުރިއެކޭ ވެސް އެއްގޮތަށް ޕެޓްރޯލާއި ޑީސަލް ދޫކުރަމުންދާ ކަމަށް އެސްޓީއޯ އިން ވަނީ މައުލޫމާތު ދީފައެވެ.
މާލެ އިން ތެޔޮ ލިބުމުގައި ދަތިތަކެއް ކުރިމަތި ވެފައިވާ ކަމަށް ދެކެވޭ ވާހަކަތައް އެސްޓީއޯ އިން ދޮގުކޮށްފައިވި ނަމަވެސް މާލޭގައި އަމިއްލަ ފަރާތްތަކުން ހިންގާ ޝެޑުތައް ބަންދުކޮށްފައި ވާއިރު، އެސްޓީއޯގެ ސަބްސިޑަރީ، ފިއުލް ސަޕްލައި މޯލްޑިވްސް (އެފްއެސްއެމް)ގެ ހުރިހާ ޝެޑެއް ދޮށުގައި ދިގޫ ކިއޫތައް ހަދާފައި އޮންނަތާ ދެ ތިން ދުވަސް ވަނީ ވެފަ އެވެ.