ނައިންޓީ ޕްލަސް ގޯލްޑް ކަޕްގެ ފައިނަލަށް މިރޭ ނިކުންނައިރު ސަޕޯޓަރުންގެ އެހީ ބޭނުންވާ ކަމަށް އައްޑޫ ޓީމުން ބުނެފި އެވެ.
މުބާރާތުގެ ފައިނަލްގައި އައްޑޫ ޓީމުން މިރޭ ނިކުންނާނީ ބ. އޭދަފުށްޓާއި ދެކޮޅަށެވެ. އައްޑޫ ފައިނަލަށް ދަތުރުކުރީ ސެމީގައި ރ. އަލިފުށި 2-0 އިން ބަލިކުރުމަށްފަހު އެވެ.
މުބާރާތުގައި ސެމީފައިނަލްގައި އައްޑޫ ޓީމަށް ވަރުގަދަ ސަޕޯޓެއް ލިބިގެން ގޮސްފައިވާއިރު، ފައިނަލަށް ޓީމު ދަތުރުކުރުމުގައި ސަޕޯޓަރުންގެ ދައުރު އިންތިހާ އަށް ބޮޑެވެ. ފައިނަލް މެޗުގައި ޓީމަށް ސަޕޯޓު ކުރަން ތަފާތު އެކި ހަރަކާތްތައް ހިންގަން ސަޕޯޓަރުން މިހާރުވެސް އަންނަނީ ތައްޔާރުވަމުންނެވެ. އެގޮތުން ފައިނަލު މެޗަށް އައްޑޫގެ ސަޕޯޓަރުން ދަތުރުކުރަން މޯލްޑިވިއަންގެ އިތުރު ފްލައިޓެއް ވެސް މިއަދު މާލެއަށް ބޭއްވުމަށް ވަނީ ހަމަޖެހިފަ އެވެ.
އަދި މާލޭގައި ތިބި ވީހާވެސް ގިނަ އައްޑޫ ރައްޔިތުން މިރޭގެ މެޗު ބެލުމަށް ގަލޮޅު ދަނޑަށް އައުމަކީ ޓީމުގެ ވަރަށް ބޮޑު އެދުމެކެވެ.
މި މެޗުގެ ކުރިން އައްޑޫ ޓީމުގެ ކޯޗު އަބްދުﷲ ހަނީފް (ބެންޖޯ) ބުނީ އައްޑޫ ޓީމު މިރޭ ނިކުންނަނީ ސަޕޯޓަރުންނަށް ތަށި ނަގައިދޭން ކަމަށާއި އައްޑު އަށް ތަށި ގެންދާނެ ކަމަށެވެ. މިއީ މުޅި އައްޑޫން ޓީމެއް ނެރެގެން ކުޅޭ ފުރަތަމަ މުބާރާތް ކަމަށްވާއިރު، ރަނގަޅަށް ތައްޔާރުވެގެން ނިކުމެއްޖެނަމަ ވަރުގަދަ އޭދަފުށި ވެސް ބަލިކުރެވޭނެ ކަމަށް ބެންޖޯ ބުންޏެވެ.
ގޯލްޑް ކަޕްގެ ފައިނަލްގައި އައްޑު އާއި އޭދަފުށި ބައްދަލުކުރާ މެޗު ފަށާނީ މިރޭ 9 ޖަހާއިރު އެވެ.