ކ. އޮޅުވެލި ބީޗް އެންޑް ސްޕާ ރިސޯޓް އިތުރަށް ތަރައްގީ ކުރުމުގެ މަޝްރޫޢުގެ މަސައްކަތްތައް އެންވަޔަރަމަންޓް އިމްޕެކްޓް އެސެސްމަންޓް (އީއައިއޭ) މަރުޙަލާ ފުރިހަމަ ކުރުމަކާ ނުލައި ކުރިޔަށް ގެންދިޔުމާ ގުޅިގެން އެ ރިސޯޓް 20،000ރ. އިން ޖޫރިމަނާކޮށްފި އެވެ.
އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން މިއަދު ބުނީ އީއައިއޭ ފުރިހަމަ ކުރުމަކާ ނުލައި އެމެރަލްޑް ރިސޯޓްސް ޕްރައިވެޓް ލިމިޓެޑް އިން އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްޤީ ކުރުމުގެ މަސައްކަތްތައް ފަށާފައިވާކަން މި އެޖެންސީގެ ސަމާލުކަމަށް އައުމާ ގުޅިގެން އެ މައްސަލަ ބަލާފައިވާ ކަމަށެވެ.
އެގޮތުން އޮޅުވެލި ބީޗް އެންޑް ސްޕާ ރިސޯޓު އިތުރަށް ތަރައްޤީކުރުމުގެ މަޝްރޫޢުގެ ޤގާނޫނާއި ގަވާއިދާ ޚިލާފަށް ކުރިޔަށް ގެންގޮސްފައިވާކަން މި މައްސަލައާ ގުޅިގެން ދެ ފަރާތް މެދު ބަދަލުކުރެވުނު ލިޔެކިޔުންތަކުންނާއި އެޖެންސީން ބެލިބެލުންތަކުން ވެސް ސާބިތުވާ ކަމަށް ވެސް އީޕީއޭ އިން ބުންޏެވެ.
އެހެންވެ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން އެކުލަވާލެވިފައިވާ ގަވާއިދުގެ ދަށުން އެމެރަލްޑް ރިސޯޓްސް ޕްރައިވެޓް ލިމިޓެޑް 20،000ރ. އިން ޖޫރިމަނާކޮށްފައިވެ އެވެ.
އީޕީއޭ އިން ބުނީ ޖޫރިމަނާ މި މަހުގެ 11 ގައި ދައްކައި ހަލާސްކޮށްފައިވާ ކަމަށެވެ.