ރާއްޖޭގައި ވޭޕް ބުއިމާއި ވިއްކުމާއި ގެންގުޅުން މަނާ ވެފައިވަނިކޮށް، ގާނޫނާ ހިލާފުވި އިތުރު 9 މީހަކު ޖޫރިމަނާކޮށްފި އެވެ.
ފުލުހުން ބުނީ މި މަހުގެ 22 ގެ ނިޔަލަށް ދުންފަތް ކޮންޓްރޯލް ކުރުމާ ބެހޭ ގާނޫނާއި ހިލާފުވި 9 ފަރާތެއް ޖޫރިމަނާކޮށްފައިވާ ކަމަށެވެ. އެއީ ޖުމްލަ 50،000ރ. ކަމަށް ފުލުހުން ބުނެ އެވެ.
ޖޫރިމަނާ ކުރި 9 މީހުންގެ ތެރެއިން އެކަކު ސައިކަލު ދުއްވަމުން އީ ސިނގިރޭޓް ބޭނުން ކުރުމާ ގުޅިގެން 10،000ރ. ޖޫރިމަނާކޮށްފައިވާ ކަމަށް ފުލުހުން ބުނެ އެވެ.
ދުންފަތް ކޮންޓްރޯލް ކުރުމުގެ ގާނޫނަށް ގެނައި އިސްލާހާ އެކު ވޭޕް ބޭނުން ކުރުން ރާއްޖޭގައި ވަނީ މަނާވެފަ އެވެ.
އެ ގާނޫނުގައި ވަނީ ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރަން ކަނޑަައަޅައިފަ އެވެ. އަދި އެތެރެކުރި ކޮންމެ އިލެކްޓްރޯނިކް ސިނގިރޭޓެއް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ އެވެެ.
މީގެ އިތުރުން އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާކޮށް ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ އެވެ.
ހަމައެހެންމެ އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާކޮށް، އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ކަމަށްވާ ނަމަ، އިތުރު 50،000ރ. އިން ޖޫރިމަނާ ކުރެވޭނެ އެވެ.
މީގެ އިތުރުން އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ އެވެ.