ރާއްޖެ އަކީ ޓޫރިސްޓުންނަށް ރައްކާތެރި ތަނެއް ކަމުގެ ޔަގީންކަން އަރުވާ ކަމަށް ޓޫރިޒަމް މިނިސްޓްރީން ބުނެފި އެވެ.
ޓޫރިޒަމް މިނިސްޓްރީން މިހެން ބުނެފައިމިވަނީ ޓޫރިޒަމް އިންޑަސްޓްރީ އަށް އަމާޒުކޮށް ޓެރަރިސްޓު ހަމަލާއެއް ދިނުމަށް އެމްޑީޕީން ރާވާފައިވާ ކަމަށް ބުނެ އެ މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ވާހަކަދައްކާފައިވާ ދަނޑިވަޅެއްގަ އެވެ. އެ ވާހަކަތަކާއި ގުޅިގެން ނިހާދު މިހާރު ވަނީ ސަސްޕެންޑްކޮށްފަ އެވެ.
އެ ވާހަކަތަކާއި ގުޅިގެން ޓޫރިޒަމް މިނިސްޓްރީން ނެރުނު ބަޔާނެއްގައި ބުނީ ނިހާދު ދެއްކި ވާހަކަތަކަކީ ސަރުކާރުން މިކަމުގައި ދެކޭގޮތް ނޫން ކަމަށާއި އެ ވާހަކަތަކާއި ގުޅިގެން ނިހާދު ސަސްޕެންޑްކޮށް މައްސަލަ ބަލަމުންދާ ކަމަށެވެ. އަދި ރާއްޖެ އަކީ ފަތުރުވެރިންނަށް ރައްކާތެރި އަދި ހުރިހާ އެންމެންނަށް ވެސް މަރުހަބާ ކިޔާނެ މަންޒިލެއް ކަމަށްވެސް މިނިސްޓްރީން ބުނެ އެވެ.
މި ބަޔާނުގައި ވަނީ ރާއްޖެ އަށް މިއަހަރު ދެ މިލިއަން ފަތުރުވެރިން އައުމާއި ގާތްވެފައިވާކަން ފާހަގަކޮށް، މިއީ ފަތުރުވެރިން ރާއްޖެ އަށް ކުރާ އިތުބާރާއި ޔަގީންކަން ދައްކުވައިދޭ ކަމުގެ ހެއްކެއް ކަމަށް ބުނެފަ އެވެ.
މީގެއިތުރުން ރައީސް ޑރ. މުހައްމަދު މުއިއްޒުގެ އިރުޝާދާއި ލަފާފުޅުގެ ދަށުން ރާއްޖެ އަކީ އަމާން މަންޒިލެއްގެ ގޮތުގައި ބޭއްވުމަށް ޓޫރިޒަމް ދާއިރާގެ ހުރިހާ ފަރާތްތަކެއް ގުޅިގެން ގިނަ ގުނަ މަސައްކަތްތަކެއް ކުރެވެމުންދާ ކަމަށްވެސް މިނިސްޓްރީން ވަނީ ބުނެފަ އެވެ. އަދި ރާއްޖޭގެ ހިތްގައިމުކަން ތަޖުރިބާކޮށްލަން ދުނިޔޭގެ އެކި ކަންކޮޅުތަކުގެ މީހުންނަށް މިނިސްޓްރީން ވަނީ ދައުވަތު އަރުވާފަ އެވެ.
ނިހާދު ދެއްކި ވާހަކަތަކާއި ގުޅިގެން އޭނާ އަށް ބޮޑެތި ފާޑުކިޔުންތަކެއް އަމާޒުވަމުން އަންނައިރު، ގިނަ ބަޔަކު އަންނަނީ އޭނާ މަގާމުން ވަކިކުރުމަށް ވެސް ގޮވާލަމުންނެވެ.