ޤައުމު އިނދަޖެހޭ ވަރުގެ ވާހަކަތައް ދެއްކުމަކީ ގަބޫލުކުރެވޭނެ ކަމެއް ނޫން ކަމަށް ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވެއްޖެ އެވެ.
އާޒިމާ މިހެން ވިދާޅުވީ ޓޫރިޒަމް އިންޑަސްޓްރީ އަށް އަމާޒުކޮށް ޓެރަރިސްޓު ހަމަލާއެއް ދިނުމަށް އެމްޑީޕީން ރާވާފައިވާ ކަމަށް ބުނެ އެ މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ވާހަކަދެއްކުމާ ގުޅިގެންނެވެ. އެ ވާހަކަތަކާއި ގުޅިގެން ނިހާދު މިހާރު ވަނީ ސަސްޕެންޑްކޮށްފަ އެވެ.
އާޒިމާ "ފޭސްބުކް"ގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ސިޔާސީ މައިދާނަކީ މިފަހަކަށް އައިސް ބޭނުންހާ އެއްޗެއް ބުނެ، ބޭނުންހާ ކަމެއް ކުރެވޭ ތަނަކަށްވެ ނިމިފައިވާ ކަމަށާއި މިއީ ޤަބޫލުކުރެވޭނޭ ކަންކަމެއް ނޫން ކަމަށެވެ. މިފަދަ "ރެކްލެސް ސްޓޭޓްމަންޓް" ހަދާ ނުވަތަ ބަސްބުނާ މީހުންގެ ކިބައިން ލިބޭ ގެއްލުން ފޫބައްދާނީ ކިހިނެއްތޯ އާޒިމާ ސުވާލު އުފެއްދި އެވެ. އަދި މިއީ މުޅި ޤައުމުގައި ޖެހޭ ލައްތަކެއް ކަމަށާއި މިފަދަ ވާހަކަތައް ދައްކަނީ ތަޢުލީމީ އަދި ޢިލްމީ ޤާބިލުކަމެއް ނެތި ކަމަށް އާޒިމާ ވިދާޅުވި އެވެ.
މީގެ އިތުރުން، މިއީ އޮޅިގެން ދެއްކި ވާހަކައެއްކަމުގައި ގަބޫލުކުރަން ފަސޭހަ ނޫން ކަމަށާއި އިއްޔެ މެންދުރާ ހަމައަށް ދިމާ އިދިކޮޅަށް ކުޅެން ތިބި ބަޔަކަށް ފުރުޞަތެއް ލިބުމުން، ބައިކޮޅަށް ގޯލެއް ނުޖަހާނެ ކަމަށް ގަބޫލުކުރަން ދަތި ކަމަށްވެސް އާޒިމާ ވިދާޅުވި އެވެ.
"އެއްކޮޅަށް ވިޔަސް އަދި އިދިކޮޅަށްވިޔަސް، ޤައުމު އިނދަޖެހޭ ވަރުގެ އެއްޗެތި ސިޔާސީ ގޯލްޖަހަން ވިދާޅުނުވާށެވެ. ޤައުމަކީ އަޅުގަނޑުމެންގެ އެންމެންގެ ޙައްޤެކެވެ. އަޅުގަނޑުމެންގެ ދަރިން ދިރިއުޅެން އޮތް ތަނެވެ،" އާޒިމާ ވިދާޅުވި އެވެ.
އާޒިމާ ވަނީ ސިޔާސީ ވިޔަސް ގައުމުގެ ކަރާމާތަށް އަރައި ނުގަތުމަށާއި އެއީ ނިހާދު އަދި އެހެން މީހަކަށް ވިޔަސް ލިބިގެންވާ ޙައްޤެއް ނޫން ކަމަށް ވިދާޅުވެފަ އެވެ.