ބުޅާތަކަށް އަނިޔާނުކޮށް އޯގާތެރިވާން ދަނޑުވެރިކަމާއި ދިރޭތަކެއްޗާއި ބެހޭ ވުޒާރާ އިން އިލްތިމާސްކޮށްފި އެވެ.
އެ މިނިސްޓްރީން ނެރުނު ބަޔާނެއްގައި ބުނީ މިހާރަކަށް އައިސް ރާއްޖޭގެ ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް ބައެއް ފަރާތްތަކުން ގޯނާކޮށް، ހާނިއްކަކުރުމުގެ އިތުރުން އެސޮރުމެން މަރާކަމުގެ ޝަކުވާތައް ލިބެމުންދާ ކަމަށާއި މިއީ ޖަނާވަރުގެ ދުޅަހެޔޮކަމުގެ މިންގަނޑުތަކާ ހިލާފު އަމަލަކަށްވާތީ، މިކަން ނުކުރުމަށް އިލްތިމާސްކުރާ ކަމަށެވެ.
ރާއްޖެއިން ބައިވެރިވެފައިވާ ދުނިޔޭގެ ޖަނަވާރުގެ ސިއްހަތާ ބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނާވަރުގެ ދުޅަހެޔޮކަމަށް ހާއްސަ އަހައްމިއްޔަތު ކަމެއް ދީފައިވާ ކަމަށާއި މީގެތެރޭގައި ދަނޑުވެރިކަމަށާއި، މުނިފޫހިފިލުވުމަށާއި، އިލްމީ ދިރާސާކުރުމަށާއި، މި ނޫންވެސް ބޭނުންތަކަށް ޖަނަވާރު ގެންގުޅުމުގައި އެސޮރުމެންގެ ދުޅަހެޔޮ ކަށަވަރުކުރުން ހިމެނޭ ކަމަށް މިނިސްޓްރީން ބުނެ އެވެ.
މިފަދަ ޖަނަވާރަކީ އިންސާނުންނާއެކު އެމީހުންގެ ވެށީގައި ދިރިއުޅޭ، ބުއްދިއެއް ނުވާ އެއްޗަކަށްވާތީ އެސޮރުމެންގެ ފަރާތުން އިންސާނުންނަށް އުނދަގޫތައް ކުރިމަތިވުމަކީ އެކަށީގެންވާ ކަމެއް ކަމަށާއި މިފަދަ ހާލަތްތަކުގައި އެސޮރުމެންނަށް ހާނީއްކަކުރުމަކީ އިންސާނިއްޔަތު ކަމުގެ ގޮތުން ބަލާއިރު ކޮށްގެން ވާނެ ކަމެއް ނޫން ކަމަށް މިނިސްޓްރީން ބުނެފައިވެ އެވެ.
މީގެއިތުރުން ޖަނަވާރަށް ރަހުމްކޮށް އަޅާލައި، އެތަކެއްޗަށް އޯގާތެރިވުމަށް އިސްލާމްދީން ވެސް ބާރުއަޅާ ކަަމަށާއި މިގޮތުން އިސްލާމްދީނުގައި ޖަނަވާރުންގެ ހައްގުތަށް ކަށަވަރުކޮށްދީފައިވާކަން ވަނީ ފާހަގަކޮށްފަ އެވެ.
"ވީމާ އެއްވެސް ޖަނަވާރަކަށް އަނިޔާވެރި ނުވެ ޖަނަވާރަށް އަޅާލައި އޯގާތެރިވުމަށް މި މިނިސްޓްރީން އިލްތިމާސް ކުރަމެވެ،" އެ ބަޔާނުގައިވެ އެވެ.