ރާއްޖޭގެ ޒަކާތު ފަންޑުން ދިން އެހީގައި ފަލަސްތީނުގެ ގާޒާގެ ރައްޔިތުންނަށް ސާފު ބޯފެން ފޯރުކޮށްދޭން ފަށައިފި އެވެ.
ގަތަރްގެ ރެޑް ކްރެސެންޓުން ބުނީ ރާއްޖޭގެ ޒަކާތު ހައުސްގެ ފަރާތުން ފޯރުކޮށްދިން އެހީގައި ގާޒާގައި ވޯޓާ ސަޕްލައި ޕްރޮޖެކްޓެއް ފަށާފައިވާ ކަމަށެވެ. މި ޕްރޮޖެކްޓުގެ ދަށުން 6،000 ފުޅީގެ ފެން އަލް ޝިފާ ހޮސްޕިޓަލާއި އަލް ހަޔާތް ހޮސްޕިޓަލުގައި ތިބި އަނިޔާ ލިބިފައިވާ މީހުންނާއި، ބަލި މީހުންނަަށް ބަހާފައިވާ ކަމަށް ބުންޏެވެ.
މި ޕްރޮޖެކްޓުގެ ދަށުން 50،000 ފޮށިގަނޑުގެ ފެން 60،000 މީހުންނަށް ބެހުމަށް ވަނީ ނިންމާފަ އެވެ.
ރާއްޖޭގެ ޒަކާތު ފަންޑުން ގާޒާ ރައްޔިތުންނަށް ހަދިޔާކުރުމަށް ނިންމާފައިވާ 100،000 ޑޮލަރު ޤަތަރު ރެޑް ކްރެސެންޓް ސޮސައިޓީއާ ހަވާލުކުރުމުގެ އެއްބަސްވުމުގައި ސޮއިކުރީ މިދިޔަ މަހު އެވެ.
އެ ފައިސާ ޤަތަރު ރެޑް ކްރެސެންޓް ސޮސައިޓީއާ ހަވާލުކުރުމަށް ހަމަޖެހިފައި ވަނީ ދެ ޕޭމަންޓަކަށް ބަހާލައިގެންނެވެ.
ޒަކާތު ހައުސްގެ ފަރާތުން ފޮނުވާ 100،000 ޑޮލަރު ޚަރަދުކުރުމަށް ހަމަޖެހިފައި ވަނީ ޣައްޒާގެ ރައްޔިތުންނަށް ސާފު ބޯފެން ފޯރުކޮށް ދިނުމަށް ޤަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއުއަށެވެެ.
މިއީ ޒަކާތު ފަންޑުން ރާއްޖޭން ބޭރުގެ ފަރާތަށް އެހީތެރިކަން ފޯރުކޮށްދޭ ފުރަތަމަ ފަހަރު ކަމަށް އިސްލާމިކް މިނިސްޓްރީން ބުންޏެވެ.